MZU Southern Campus-ah harsatna tawk

Higher and Techincal Education Minister Dr. R. Lalthangliana'n Lunglei-a MZU Southern Campus din tura hmalakna ah Sawrkar laipuiin State Sawrkar sum hmang tura a rawn tih avangin harsatna an tawk tih a sawi.

Nimin-a Assembly inkhawm ah Aizawl South -I bialtu MLA C. Lalsawivunga zawhna leh zawh belhna dangte a chhannaah Dr. R. Lalthangliana chuan MZU Southern Campus dinna tur ram tihfel a ni tawh a, Land Lease Certificate pawh MZU kuta hlan a ni tawh tih a sawi a. Campus buatsaih a nih chhunga bul lo tan lailawk nan Pukpui-a Mizoram Engineering College Building chu lo luah tura ruahman niin, MZU Southern Campus din a nih theih nan hian Mizoram University-in Sawrkar laipui Human Resources Development Ministry-ah Detailed Project Report (DPR) an thehlut tawh tih a sawi.

Dr. R. Lalthangliana chuan, an tum leh ruahman anga MZU Southern Campus-a Class kal theih a nih loh chhan chu a tira an sawi tel loh Southern Campus din turah Ministry lamin State Sawrkar sum hmanga lo buaipui tura a rawn tih vang a ni tih a sawi a. Hemi vang hian harsatna tam tak an tawk a, State Sawrkar sum hmanga buaipui tur hian a tihngaihna a vang a, hmalak a har hle tih a sawi bawk a ni.