Lakhuihthei MT 15.7 thawnchhuah leh a ni

Tuichangral Organic FPC Ltd. thar Lakhuihthei metric tonnes 15.7 chu Sonipat, Haryana leh a chhevel a hralh turin nimin zing khan Agriculture Minister C. Lalrinsanga chuan Ch. Saprawnga Truck Terminal, Rangvamual atangin a vailiam.

Heng Lakhuihthei vailiamna puala inkhawm neih ah Agriculture Minister chuan kan thlai thar te man man zawka hralhna kawng a rawn inhawn belh zel tih sawiin, Kuthnathawktute tan a phurawmin tan lak sawt erawh a ngai tih a sawi a. Tunah hian pawn lama mamawh zat kan la thar pha lo hle tih sawiin, “India ramah heng kan thei leh thlai thar te hi duhtu an tam a, min dawrtu tur awm leh awm loh thuah harsatna a awm lo a ni,” a ti. Agri & Allied Sector hnuaiah Service Provider kan hman mek te an vengva in hmangchang an hre hle tih Minister chuan sawiin, anni tan hian hralhchhuahna buaipui chu thil harsa a nih loh rualin kan thlai leh thei thar te tam tham tak lakkhawm awlsam bawk si an hmuh zung zung theih erawh a ngai tih a sawi a. India ram chu khawvela consumer market lian ber zing a mi a nih avangin Mizoram State Economy hampuarna khawp sum chang thei thlai leh thei hralhna turah harsatna a awm dawn lo tih a sawi a. Thawnchhuah tura tam tham tharchhuak thei tura tan la chhunzawm zel turin farmer te a chah bawk.

Lakhuihthei vailiamna hunah hian Dr. ZR. Thiamsanga MLA pawhin Sawrkarin kuthnathawktute hmakhua a ngai a, a takin an tana thawk mek zel tih a sawi a. Council of Ministers Meeting hnuhnung berin Grep chingtute tana hlawkna tura thutlukna a siam chu kuthnathawktute duhsakna a ni tih a sawi bawk.

Tuichangral Organic FPC Ltd hi nikum (2021) khan Mission Organic Mizoram Agriculture Department hnuaia din a ni a, Khawzawl District a khaw 8 - Khawhai,Sialhawk, Tlangmawi, Tlangpui, Chalrang, New Chalrang, Vangtlang leh Lungtan atangin lakhuihthei ching mi 500 intelkhawm te din niin MOM hian FPC Ltd. enkawl tur hian Service Provider atan Clover Organic Pvt. Ltd. hi a ruat a. Nimin zing-a vailiam tak Lakhuihthei hi khaw 7 atanga lakkhawm niin 20 metric tonnes phur thei Refrigerated Truck phai lam atanga lo kalin a rawn phur a. Metric Tonne 20 beisei a nih laiin lakkhawm theih zat chu 15.7 metric tonnes a ni ta zawk a. He lakhuihthei hi Surifresh Extract Pvt Ltd, Sonipat Haryana hnenah rate tha tawk taka hralh a ni.

He hunah hian Mission Organic Mizoram, Agriculture Department hnuaia Service Provider, Clover Organic Pvt. Ltd. in Lakhuihthei thawnchhuah chungchanga hmalak dan tarlangin, Lakhuihthei thawnchhuah hian a thlenna tur hi kar khat chhung velin a thleng hman dawn thu leh Lakhuihthei lei duh rawn betu an hmuh nual thu an sawi bawk a ni.