Mizoram Assembly House-ah Paper hman tlemna tur National E-Vidhan Application hman tan a ni

Mizoram Legislative Assembly Favang thutkhawm ni 3 awh tur chu nimin khan tan a ni a, House chhunga Paper hmang tlem tura hmalakna kal zelah E-Vidhan Application hman tan a ni a. Chief Minister chuan Sawrkar hnathawk zirtirtute chu an post-na hmuna an awm ngei theih nan hmalak a ni dawn tih a sawi bawk.

Mizoram Legislative Assembly 8-na thutkhawm vawi 10-na hi nimin khan Aizawl-a Assembly House-ah neih tan a ni a, thutkhawm tan a nih rualin hian Assembly Speaker Lalrinliana Sailo chuan, tunhmaa an la tih ngai loh thil thar, E-Vidhan Application hman a nih thu hi House-ah apuang a. Member tin te dawhkhan-ah Tablet chhawp vek a ni a, E-Vidhan chu lehkha tel lo, Paperless tih nimahse, a theih vek loh avangin a tlem thei ang ber Paper hman a la ni rih ber tih a sawi bawk. Speaker sawi danin, Mizoram Legislative Assembly E-Vidhan Application kalpuina atan hian Sawrkar laipui-a Parliamentary Affairs Ministry atangin cheng vbc. 8.70 chuang dawn a ni a, he Project kal turah hian State sawrkar tum ve tur zaa 10 chu Mizoram Sawrkar pawhin a pechhuak ve nghal a ni. Speaker Lalrinliana Sailo chuan, E-Vidhan Application hman tur hian MLA te chu training pek vek ni mahse, a bultanna a nih avangin Paper hman pawh a la theih tho tih a sawi a, e-book hmangin House Document pawimawh te dah vek a ni tih a sawi bawk.

Thutkhawm ah hian Chief Minister Zoramthanga chuan Sawrkar hnathawk Zirtirtute an post-na hmuna an awm theih nan theihtawpin hmalak a ni dawn tih zawhna leh chhanna hunah School Education Department changtu Minister a awmloh avanga zawhna a chhan sakna ah a sawi a, Chief Minister chuan zirtirtu sawnchhuah thin te chu Humanitarian Ground a dah chhuah te an ni tih sawiin, Pupil Teacher Ratio inang tlang thei ang ber turin DIET a Lecturer te chu sem rual an nih thin thu leh DIET Zirtirtu indaihlo chu Sawrkar lam atangin theihtawpa hmalak ani dawn tih a sawi a. Khawpuia School building tha lo tak tak te chu Sawrkarin sum a neih angin a chhe zual thawmthat zel a tum tih a sawi bawk.