Grape Wine siam turah Excise Duty lak a ni dawn

Excise and Narcotics Minister Dr. K. Beichhua chuan dan hnuaia Mizoram chhunga Grape thar atanga Wine siam turah Excise Duty lak a ni dawn tih a sawi.

Nimin-a Assembly inkhawm zawhna leh chhanna hunah ZPM Member VL. Zaithanzama'n Wine Rules siam tum a nih leh nih loh a zawhna leh zawh belhna dangte a channaah Excise and Narcotics Minister hian, Mizoram chhunga Grape tharchhuah atanga Wine siam phal tura rawtna chu Mizoram Sawrkar Council of Ministers thukhawmin a pawm tawh a, tunah hian Law Department-ah pawmpui tura thawn mek niin, an pawm hnuah he dan thar hi hman tan a nih thu hriattirna tihchhuah a ni dawn tih a sawi.

Dr. K. Beichhua chuan, Mizoram chhunga Grape thar atanga Wine siam phalna dan chu Grape Wine Rules ti-a vuah tur a nih thu sawiin, he dan hnuaiah hian Mizoram chhunga Grape thar atanga Wine siam phal tur a nih angin State pawn leh ram dang atanga Grape lakluh atanga Wine siam chu a rem ve dawn lo tih a sawi a. Grape Wine Rules chu a taka hman a nih hunah kumin May ni 27-a Excise Department-in Grape Wine a man te chu engtianga tihzui tur nge tih thuneituten an la ngaihtuah dawn niin a sawi a, khami tum khan Grape Wine chauh ni lo, Zu pangngai pawh man an nei nual tih sawiin, a neitute hnena Rs. 3000/- an chawi tir chu Zu khapna dan, MLP  Act hmanga hmalakna a nih avangin pek tur tihna a awm lo tih a sawi a. Grape Wine Rules siam chungchangah hian Grape chingtu, Grape Grower Society ten Political party Congress, BJP leh ZPM atangin remtihna an lak thu House chu a hrilh bawk.