VC 50 te hnenah Computer semchhuah a ni

LAD Minister K. Lalrinliana chuan Mizoram-a Village Council 50 te hnenah Common Service Centre (CSC)-a hman tur Computer leh thildang mamawhte nimin khan a Office-ah a sem.

Computer semna hunah hian LAD Minister chuan Central sawrkara Ministry of Panchayati Raj chuan Panchayat/Village Council hnathawk thate lawmman pek leh tiphur lehzual turin ‘National Panchayat Awards’ a duang chhuak tih a sawi a, India rampum huapin Gram Panchayat nuai 2.50 chuang lai awm zinga hnathawk tha thlanchhuah chu Ministry of Panchayati Raj chuan tunlai IT lama thiamna hmang tangkaiin portal www.panchayataward.gov.in siamin Panchayat/Village Council-te chuan zawhna chhangin, an hnathawh thate an puang zar thei tih a sawi a. He portal hi kumtin Panchayat/Village Council hnathawk thate National Panchayat Award dawng tur thlan nan hman a ni tih sawiin, Computer dawng thar Village Council 50 te chuan heng hmanrua te hmang tangkai a, National Panchayati Award dawng thei tura tang lehzual turin a chah a, Mizoram-ah pawh Village Council 6 in ‘National Panchayat Award’ chi hrang hrang an dawn tawh thu pawh he hunah hian a sawi bawk.

Nimin-a Computer dawngtute hi District hrang hrang atanga thlan te niin Serchhip District atang pawhin, Sialsir, Lungkawlh, Thentlang leh Vanchengte an tel a, heng Computer an dawn te hi CSX-a hman tur niin heng CSC-ah te hian Passport, PAN Card, Adhaar Card siam, Online tickets-Air., bus, etc buaipui, NIELIT Services, NIOS Services, Mobile recharge, Xerox, Passport size & Photo Printing te awlsam zawka siam/tih theih niin khua leh a chhehvel mipuiten tangkai takin an hmang thin a ni.