Council of Minister thurel ah Grape chingtute lawmin Rules chipchiar erawh hriat ala ni lo thung

Mizoram sawrkar Council of Minister thukhawmin Grape Wine siam phalna tur dan (rules) a pawm chu Champhai leh Hnahlan-a Grape chingtute chuan lawmawm an tih thu an sawi a, hetihlai hian niminpiah-a 'Rules' pawm tak chu 'Notify' tur a la nih avangin Rules thar hnuaia inkaihhruaina tur kimchang erawh hriat theih a la ni lo.

Niminpiah-a Council of Minister thutkhawm ah ‘The Mizoram Liquor (Prohibition) Draft Rules, 2022’ chu pawm niin, he dan hnuaiah hian Zu zawrh khapna chu khawng taka kalpui zel tur a nih rualin Mizoram-a kuthnathawktute Grape thar atangin Sawrkar in phalna a pekte tan Wine siam leh hralh phalsak a ni dawn a, hei vang hian Champhai leh Hnahlan Winery-ah dan hnuaiah Grape Wine siam leh zawrh theih a ni leh dawn a ni. Hetihlai hian Excise & Narcotics Department hotute chuan, Rules thar chu la 'Notify' tur a la nih vangin tunah chuan Rules hnuaia inkaihhruaina tur kimchang hriat theih a la ni lo tih an sawi thung a ni.

Hnahlan Grape Growers’ and Processing Cooperative Society hruaitute chuan Council of Minister in Grape Wine siam phalna tur dan a pawm ta chu lawmawm an tih thu sawiin, inkaihhruaina siam dan tur kimchang hriat la ni lo mah se thawk khat erawh a veng niin an sawi a ni. Hnahlan Grape Growers’ and Processing Cooperative Society hruaitute sawi danin, kumin ah Grape rah kg ah Rs. 60 in quintal 1,500 chuang hret an lei a, tun dinhmunah Wine a siam tur Grape tui sawrsa litre nuai khat (1) chuang Winery ah an nei mek bawk a ni.

Champhai Grape Grower's Society hruaitute pawhin Council of Minister thutlukna chu lawmawm an tih thu thuthar thehdarhtute zawhna chhangin an sawi a, tun Assembly Session lo awm tur zawh hnu, remchang hmasa berah Excise Minister Dr. K. Beichhua sawmin, Sial nen a lawmna ropui taka buatsaih an tum tih an sawi bawk. Champhai lam hian kuminah grape rah kg ah Rs. 60 in quintal 1,100 bawr vel an lei tih an sawi a, Winery-ah Grape tui sawrsa lirtre nuai thum (3) chuang an nei mek tih an sawi bawk a ni. Tun thla September ni 6, 2022 hian Baptist Church of Mizoram (BCM) nen ruahmanna an lo siam tawh angin, Sacramental Wine chungchangah inremna an ziak thar leh dawn tih Champhai Grape Grower's Society hruaitute chuan an sawi bawk a ni.