Chief Minister Support Car House-ah sawifiah

Chief Minister Zoramthanga'n Chief Minister Support Car chu a hmantlak tawh loh avangin a thlak nan Jeep Compass thar pahnih lei a ni tih House a hrilh.

Nimin-a Assembly thutkhawmah Opposition Group Leader Lalduhoma zawhna leh zawhbelhna dangte a chhannaah General Administration Department enkawltu Chief Minister Zoramthanga chuan kum 2019 khan Minister 11 te hman tur Verna Car leh Scorpio 11 ve ve lei a ni a, heta sum sen zawng zawng chu Rs. 316,36,538/- a ni tih a sawi a. Hemi kum vek hian CM Support Car atan Jeep Compass pakhat Rs. 25,56,000/- a leiin hemi bakah hian tunhnai deuh khan CM Support Car a hman tur thoin Jeep Compass tho Rs. 24,23,901/- lei a ni tih a sawi.

Chief Minster chuan, thuneihna an chan hlim khan Minister te hman tur lirthei kha a that tawk tawh loh avangin lei rawt a nih angin Minister 11 te hman tur Verna Car leh Scorpio hi lei a ni tih a sawi a. Chief Minuster hman tur chu a la tih theih naw naw-ah ngaiin, a thar lei lovin a hlui a hmang a. Engemaw chen an hman hnuah a hman tlak ta lo a, kawng chho-ah te nam a ngaih avangin tihngaihna a awm tak ngang loh avangin Motor thar hi lei rawt a nih angin 2019 khan Jeep Compass hi lei a ni tih a sawi a. Hemi hnu hian CM support Car pakhat, amah ngeiin thlak loh mai a lo rawt tawh chu kal thei ngang lo khawpin a chhe leh a, lei loh theih loh a nih vangin tunhnaiah lei leh a ni a. Enge lei ang tih an ngaihtuahna ah amah bawkin, a hmaa an lo lei tawh ang Jeep Compass chu lei leh mai a rawt angin hmanhmawh tak lei leh a ni tih a sawi a ni.

Chief Minister tunhnaia Jeep Compass an lei hi Department Vehicle Purchase Board remtihna lak hmaa lei a ni tih House a hrilh a. Hei hi a chhan chu CM Support Car chhia thlakna tura hmamhnawh taka lei a nih vang a ni tih sawiin, Office atangin sum remchang lo hman phawt a ni a, Department Vehicle Purchase Board-in a remtihpui hnuah rulh leh mai tura tih niin, tunah hian Department Vehicle Purchase Board pawhin a pawmpui tawh tih a sawi.