Electric Pre-paid Smart Meter vuah tum a ni
Mizoram-ah Pre-Paid Smart Meter hmang tura hmalak chhoh mek a ni a, he ruahmanna kalpuina tur hian sawrkar laipui atangin cheng vbc. 173.63 hmuh a ni tawh.
Sawrkar laipui Flagship Programme kalpui mekah India ram puma Electric Eng chhit man chawi dan tur hi pek lawk (Pre-Paid System) theiha leh vek tura ruahman niin Mizoram chhunga Consumer Meter zawng zawng pawh Pre-Paid Smart Meter-a thlak vek tura hma lak chhoh mek a ni a, hemi chungchang hi nimin khan Mizoram Sawrkar Power and Electricity Department-a Engineer te tan National Power Training Institute buatsaihin zirhona neih a ni a, Mizoram chuan he Metering Scheme kalpuina tur hian Ministry of Power atangin cheng vbc. 173.63 sanction a hmu tawh a ni.He hmalakna hnuaiah hian Internet Service provider te angin DBFOOT (Design Build Finance Operate Own and Transfer) Model hmangin Advance Metering Infrastructure Service Provider pakhat P&E Department hian a ruai ang a. Anni hian Pre-Paid-a Eng chhit man Top-up mai theihna tur thil tul zawng zawng an ngaihtuah dawn a. Smart meter hman tan a nih hunah Control Centre atangin Meter Disconnect leh reconnect a tih theih tawh dawn a. Bill ba chu chawp leh chilhin a hmuna kal kher ngai lovin tih thim nghal theih a ni dawn a ni. Consumer-in a hman tawk te te in a Eng chhit man zat tur thla khatah vawi 2 emaw, vawi 3 te pawh a Top up theih tawh dawn a, thla tawpah a hlawma pek theih a ni tawh lo ang.
Smart Meter Prepaid Mode kalpui a nih hunah Meter Reading lak atanga Bill siam thlengin mihring an inrawlh thei tawh dawn lo a, bill siam sual lakah thui tak a veng thei tura beisei a ni. Mobile apps hmangin Electric Eng chhit man pek lawk tawh tur a ni dawn a, Electric bill chhut chhuahna atan tha leh sum sen a ngai tawh lovang a, Sub-Division Bill Counter-te hi Electric bill dawn nan bik chuan hman zui a ngai tawh lo bawk ang. 11kV Feeder Level leh DT Level Energy Audit & Accounting te felfai zawka neih theih a ni tawh anga, hei hian kawlphetha kal ral tur engemawchen a veng dawn a ni.