Thla nga chhunga Chhiah hmuh vbc. 416.32 tling

Mizoram sawrkar a Taxation Department chuan kumin April atanga August (thla nga) chhung khan Chhiah (Tax) chi hrang hrang Rs. 4,16,32,82,023 an hmu tling tawh a, chu chu 2022-23 a Chhiah hmuh beisei zat (target) Rs. 7,30,03,51,000/- atangin za a 57.02 a tling a, Chhiah hmuhna pui ber chu GST a ni.

Taxation Department tarlan danin, Mizoram-ah Chhiah chi li (4) - GST, Profession Tax, Sales Tax leh Entertainment Tax lak thin a ni a, kumin thla nga chhung hian GST-ah Rs. 3,58,11,13,232, Profession Tax-ah Rs. 5,16,35,449, Sales Tax-ah Rs. 53,03,29,196 leh Entertainment Tax-ah Rs. 88,876 leh Chhiah dang atangin Rs. 1,15,270 an hmu tawh a ni.

Chhinchhiahna atanga a lan danin kum kal mek April thla khan Chhiah Rs. 90,46,82,225 hmuin, May-ah Rs. 93,46,38,881, June-ah Rs. 80,00,86,741, July-ah Rs. 64,35,80,409 leh August-ah Rs. 88,02,93,767 hmuh a ni a, tun thla nga chhunga chhiah hmuh tawh zawng zawng chu Rs. 4,16,32,82,023 a tling a ni. Kumtin sawrkarin Tax Revenue lakkhawm zat tur a bituk thin a, kum 2021-22 chhung khan Chhiah khawn tur a bituk zat chu cheng vbc. 717.13 a ni a, an target chu cheng vbc. 177.71 a khumin an Chhiah khawn tlingkhawm zawng zawng chu cheng. vbc. 894.74 a ni.