Tha thlah lova ruihhlo do hna thawh a ngai

Excise & Narcotics Department Minister Dr. K. Beichhua chuan, “Vawiin a kan thalaite run mektu ruihhlo hi kan hriatchian a, a do hna tha thlah lova kan thawh a ngai a ni,” a ti.

NE Khawdungsei-a ruihhlo do nana ralven buk hmun 2 a an siam, ‘No. 4 Check Gate tia vuah’ chu Inrinni khan END Minister Dr. K. Beichhua hian tlawhin Ruihhlo do a tlawmngaia thawkchhuak, cheng khat mah hlawh lo, chawi belh, mahni hna tul pawh thawk hman lo, mite nun chhanna a nih avang zawka in volunteer a hmu chu a lawmzia sawiin, Excise & Narcotics Department a enkawl hnua a hlim ni ber a nih hial thu sawi a. “Vawiin-a kan thalaite run mektu ruihhlo hi kan hriatchian a, a do hna tha thlah lova kan thawh a ngai a ni,” a ti a. Ruihhlo dona ah tanrual a ngaih thu sawiin, mi thenkhat ten ‘Do do mah ulang a rem chuang lovang,’ tia sawrkar deusawhtute awm mah se heng mite hian an hriatchian lohzia a sawi a, “Ruihhlo do hna thawk lo phei ilang kan ram hi a chhe lehzual hle dawn a ni,” a ti bawk.

Dr. K. Beichhua hian NE Khawdungsei Branch YMA ten an khua leh Ngopa inkara ruihhlo supply tirem tura Ralven buk an siam chu tlawh hmasa in NE Khawdungsei Village Defence Party leh Village Council ten an enkawl Khawkawn leh NE Khawdungsei inkara mi a tlawh leh bawk a, he hunah hian NE Khawdungsei Branch YMA hruaitute chuan chhun zan zawmin ni 90 mahni In lum chhuahsana an riah tawh thu an sawi a ni.