Aizawl khawpui chhung bakah Lunglei, Champhai leh Serchhip District-ah te Dengue natna a leng mek

Tunlai hian Mizoram-ah Dengue natna a leng mek a, Aizawl khawpui chhung bakah Lunglei, Champhai leh Serchhip District-ah te a leng niin Health Department hotute chuan an sawi a, Dengue bakah hian Chikungunya leh Japanese Encephalitis vei te pawh Mizoram-ah hian hmuhchhuah an ni tawh a ni.

Health Department-a Joint Director (Malaria) Dr. Hmingthanmawii chuan tunhma kha chuan Dengue vei hi Aizawl-ah chauh hmuh a ni thin tih sawiin, tunah erawh chuan District hrang hrangah hmuh a ni mek tih a sawi a. Aizawl khawpui chhungah phei chuan a hri kai an tam hle niin a sawi a. August thla chhunga Dengue natna vei report hi District hrang hrang leh Aizawl Civil Hospital atanga an la dawn loh avangin a dinhmun dik tak erawh an sawi thei lo tih sawiin, kumin chhung, July thleng khan Dengue vei hi Mizoram-ah 51 hmuhchhuah a nih thu a sawi a. Mizoram a leng hi a hlauhawm loh zawk leh a veite’n an tawrh nat loh zawk a nih avangin tun thlengin Dengue vanga nunna chan an la awm loh thu a sawi.

State Vector Borne Diseases Control Program (SVBDCP) lamin Dengue laka inven dan turte School hrang hrangah te, Vantlang Inkhawm ah te leh tlawmngai pawl hruaitute hnenah an zirtir a. Dengue natna pudarhtu Thosi chi khat, Aedes hi Mizoram-ah a tam a, zanah ni lovin chhunah mihring a seh thin a, chuvangin thawmhnaw tluan hak leh a lang thei chin a Thosi hnawttu inhnawih bakah khawchhung leh dai vela Thosi pian theihna tuitling awm lo tura hmalak te an zirtir a. He hri lenna hmun ni a hriatah mithiam te an intir thin bawk a ni.

Mizoram-ah hian kum 2013 khan Dengue vei 7 hmuhchhuah a ni a, heta tang hian kumtin he hri vei hmuhchhuah hi an awm ziah a. Kum 2016 khan tam berin mi 580-in an vei a, kum 2017-ah mi 136 in vein kum 2019 khan mi 131-in an vei bawk a ni.

Mizoram-ah hian Chikungunya natna vei hi kum 2018-ah mi 10 hmuhchhuah a ni a, nikum hmasa khan 67 hmuhchhuah a ni bawk a. Japanese Encephalitis natna vei hi kumin July thla khan Thenzawl-ah mi pakhat hmuhchhuah a ni bawk.