Bru 1.348 te Mizoram E. Roll atangin paih tawh

Mizoram Election Department chuan Tripura a inbengbel tawh chunga Mizoram Electoral Roll-a hming chuang Bru vote nei mi 1,348 te hming chu Mizoram Electoral Roll atangin an paih tawh.

Joint Chief Electoral Officer David Liansanglura Pachuau hnen atanga thudawn danin Tripura Election Official-te chuan Mizoram-a Vote nei thin hming 5,009 chu Tripura Electoral Roll-ah an thun tawh a, amaherawh chu ERONet hmanga an hming paih turte an rawn thawn muan avangin hming 1,348 chauh hi Mizoram vote neite ziahna atanga paih a la ni. Hemi chungchang ah hian Election Department chuan Election Commission of India hnenah Tripura Election hotute lo hrilh turin an ziak tawh a, Election Commission pawhin Tripura sawrkar chu Electoral Roll-a Bru hming an thunte Mizoram Election Department hnena hriattir nghal zel turin an hriattir tawh a. Chuti chung chuan helama hming an lo paih ve zel theihna turin ERONet hmanga inhrilhchhawn kawngah an la che chak thei chuang lova, tunhnaiah hian hming 89 chauh an la rawn thawn belh leh a ni.

Tarlan tawh thin angin Oct. 21, 1997-a Mizoram-a Bru tam tak Tripura-a an chhuak hnuah January ni 16, 2020-a sawrkar laipui, Mizoram leh Tripura sawrkar leh Bru pawl hrang hrangte inremna siam anga heng Bru te Tripura a an inbenbel phalsak an nih tak avangin tunhnai atang khan Tripura Electoral Roll-ah an hming thun chhoh a ni ta a. Tripura Electoral Roll-a hming thun an rawn hriattir apiang Mizoram Election Department-in an lo paih ve nghal zel a ni.