ZPM Party in Sustainable Development & Reform Policy (SDRP) an tlangzarh

ZPM Party chuan nimin khan Aizawl Vanapa Hall-ah Sustainable Development & Reform Policy (SDRP) chu an tlangzarh a. SDRP hnuaia an hmalakna tur hrang hrang he hunah hian tarlan niin, “Hun rei tak kan aupui tawh Sawhthing lei dan tur pawh kan duang fel thawkhat tawh,” an ti.

Nimin a SDRP tlangzarhna hun hi ZPM Working President K. Sapdanga chuan kaihruaiin ZPM President Lalliansawta chuan SDRP hi a tlangzarh a, Policy-ah hian ZPM ruangam a lan thu sawiin, “Nakumah inthlanpui kan hmabak a, kan tlin ngei theih nan engnge kan tih ang. Sum sem tur kan nei lo a, kan duh hek lo; nihna emaw, hna emaw insawihmuh kan tum hek lo, amaherawh chu ZPM auhla pawimawh tak chu mitinte hi mahni leh mahni intanpui thei tura siam a ni,” a ti a. “ A mawm a awmlo a, thlantui a awm a ni. A huphurhawm a, a rit zawnga lak chuan party danga pem nawl nawlna tling a ni,” a ti a. “Rinawmna leh taimakna nen, kan tu leh fate tan mipui sawrkar, kalphung thar tungding ila, chu thawhrimna tello chuan Zoram her luai luai tawh hi kan tungding zo lo ang tih a hlauhawm a ni. Chutiang tur chuan ZPM-a ka thawhpuite leh Zoram mipuite ka sawm a che u; kan thlantui i ui lovang u,,” a ti bawk.

He hunah hian ZPM Leader Lalduhoma MLA pawhin, “Kan policy kha a bu-ah chuan azawng zawng a tih theih loh a, a bu chhah zawk a la awm a ni; chung zawng zawng innghahna chu Mizoram rorelnaah Pathian ram lo thleng rawh se tih hi a ni,” a ti a, “Hei hi ZPM lungphum, kan policy innghahna a ni,” a ti. Lalduhoma chuan, “Mizoram politics hi Pathian mite luhchilh tlak lova kan ngai a nih chuan a dik lovang. Setana ta nia kan hriat chuan a chhungah kan zuanglut anga, Pathian rama chantir turin kan bei tur a ni dawn lawm ni? Kan ramin teh dik tur a neih lai hian, kan neutral ngawt thei lovang. Rorelna thleng phak harhna kan mamawh a, chutah chuan politician-te hi kan mawhphurhna a sang hle, kan nunte pawh i uluk ang u. Pathian duhdana ram rorelna kalpui hi ZPM-in kan tum ber a ni a, chu chu ZPM hian beiseina thar nen kan thlir a ni,” a ti bawk.

He hunah hian ZPM Generl Secretary i/c Policy & Research Dr. KC Lalmalsawmzauva chuan policy chungchang sawizauna neiin, “Policy hi kan inziah that siak lo a, Research based-a duan a ni,” tiin, “Kan leiba chhawm chhoh tur ngaihtuahna avangin policy-a kan dah tam tak erawh kan phawrh ngam rih lo. Sem policy kan zuar lo a, SDRP hi mi taima leh thawkrim te tana duan a ni,” a ti.

An Policy chungchang hi sawifiahin, “Kuthnathawktute kan dah pawimawh ber dawn a, an pualin Budget-ah pawh sum kan dah ang. Progressive Tax hmangin Land Reforms kan kalpui dawn a, Zau beihpui kan thlak dawn bawk. Thalaite entrepreneurship lamah an kal theih nan sawrkar chu Facilitator-ah kan tang dawn a ni. Sustainable development kan kalpui dawn a, kan Environment dah pawimawh ber chungin hmasawnna kan kalpui ang,” a ti.

Minimum Support Price leh Crop Insurance te kan leiba chhawm chhoh tur ngaihtuahin fimkhur takin an kalpui tur thu te, Tlawng khuapin Electric Bill kum 5 chhungin an tipung dawn lo tih an sawi a. Contract hna te Open Tender hmanga thlan thin a nih tur thu leh contract hna hralh chhawn erawh phal a ni lo tih an sawi a. Health Care changtlung zawka kalpui an tum bawk.

Heng bakah hian mipui Sawrkar siam nan Village Development Committee dinin,VC te chauh niloin party tin te leh Prominent Citizens te tel ve na tur an kalpui dawn thu te, CM-in Work Department-te enkawl lovin Corruption do nan Lokayukta an thuam chak dawn thu leh MLA te facilities a zatve-in an tihtlem dawn thu leh Sawhthing lei dan tur an duan fel thawhkhat thu te tarlan a ni bawk.