Lalremsiami ropui taka lo hmuah a ni

Birmingham-a Commonwealth Games neih zawh taka India tana Women's Hockey Bronze Medal latu Lalremsiami chuan nimin khan Mizoram rawn thlengin Lengpui Airport-ah ropui taka lo hmuah a ni.

Lalremsiami hmuahna inkhawm tawi hi Lengpui Airport hungchhunga chawlhbuk-ah buatsaih niin Sports & Youth Affairs Board Vice Chairman TC. Pachhunga chuan Lalremsiami hlawhtlinna a chhuanawm tih sawiin, a hlawhtlinna phena thil pawimawh tak tak a tawrhchhelna, tumruhna, huaisenna, mahni invawntheihna leh Pathian a tihna chu thangtharte leh infiammi te chotu, phurna petu ni ngei se, a nuna entawntlak awmte hi inzirnan hmang se a duh thu a sawi a. Mizoram in Commonwealth Games-a India aiawh tura infiammi pahnih Lalremsiami leh Jeremy Lalrinnunga a tirh ten hlawhtlinna changa Medal an hawn ve ve chu lawmawm a tih thu leh Mizoram sawrkarin rei rial lovin anni pahnih lawmpuina leh chawimawina hun a buatsaih thuai dawn tih a sawi bawk.

CWG 2022 Women's Hockey Bronze Medalist Lalremsiami pawhin a hlawhtlinna te Mizoram mipuiin an lo lawmpui a, sawrkarin a puala inhmuahna hun a buatsaih chu ropui a tih thu a sawi a. A Medal hawn chu ama ta bik a nih loh thu leh Mizote ta liau liau a nih thu sawiin, a tana mipuite tawngtaina leh an duhsakna zawng zawngah lawmthu a sawi bawk..

Lalremsiami hmuahna hunah hian Dr. Lalrozama, Secretary, SYS chuan inlawmna thu a sawi a, Sports & Youth Services Department, Mizoram Olympic Association, Mizoram State Sports Council, USAM, Hockey Mizoram, Sports Authority of India, Central YMA, Govt. Hrangbana College leh Sports Association hrang hrangin Lalremsiami hnenah hian lawmpuina pangpar leh thuziak te an hlan a. Thuthar thehdarhtute nen inkawmna an neih hnuah Kolasib a pan leh nghal a ni.