Serchhip District-ah SDO (Civil) leh BDO thuthmun ah Independence Day lawmna neih a ni

India Independence Day vawi 76-na chu nimin khan Serchhip District-a SDO (Civil) leh Rural Development Block thuthmun ah te urhsun taka hman a ni.
Thenzawl-ah chuan India Independence Day lawmna hi SDO Civil Office kawt-ah neih niin SDO (Civil) Beithlotha Nohro chuan Hnam Puanzar a pawtparh a, Thenzawl khawchhunga Sawrkar Department hrang hrang te hmalakna leh hmasawnna hnathawh hrang hrang sawiin, India ram zalenna Ni ah ramin zalenna a hmuh theih nana nunna hlantute leh theihtawp chhuahtute mipui ten hrereng a, zahna chibai buk thar theuh turin a sawm bawk. He hunah hian Police Training School (PTS), Thenzawl-a Police chawimawina dawngtute leh HSLC leh HSSLC Exam-a Thenzawl Centre atanga Pawl 10 leh Pawl 12 zirlai, Mark hmu tha pahnih te hnenah chawimawina hlan a ni bawk.

North Vanlaiphai-ah chuan SDO (Civil) Office Tual-ah Independence Day lawmna hi neih niin SDO (Civil) H. Lalhruaitluanga chuan Hnam Puanzar a pawtparh a, mipuite chu zalenna ni chibai bukin, “Tunlai ah khua leh tuite hian kan rights chu kan hre êm em a, chutih rual chuan duty kan nei tih te hi kan hriat tel a ngâi a, chu kan duty chu kan ti hlawhtling em tih pawh kan ngaihtuah tel a ngai a ni,” a ti a. Zalenna chu a hlu tih sawiin, “Zalenna hian hmasawnna a keng tel tur a ni,” a ti a. Sawrkar in a hna thawk tura a chhawr leh hlawh a pêk te chu sawrkar in ti tura a tuk chin chiah thawh tum lova mipui rawngbawltu an ni tih hre thar turin a chah bawk. He hunah hian North Vanlaiphai-a sawrkar hnathawk, khawtlang hruaitute leh tlawmngai pawl hruaitute an tel a ni.

Serchhip District-a RD Block thuthmun East Lungdar-ah pawh India Independence Day hi urhsun taka hman niin zing dar 7:00-ah East Lungdar Bazar Kawn-ah khawtlang huapa hun hman a ni a, he hun hi East Lungdar VCP K. Lalngaizuala chuan kaihruaiin Serchhip District Settlement Officer Lalrinsanga Hnamte chuan India Hnam puanzar pawtparhin mipuite hnenah thuchah a sawi a, hri leng avanga kum hnih lai India Independence Day lawmna neih mumal theih a nih loh hnuah mipuite nen hun an hmang ho leh thei chu lawmawm a tih thu a sawi a ni. East Lungdar-ah hian Independence Day pual hian Football (Mipa) leh Volleyball (Hmeichhia) inelna buatsaih niin nimin chawhnu lam khan Final khelh a ni bawk.