Vawiin-ah State pahnih Minister te an inbe dawn

/

Mizoram sawrkar leh Assam sawrkar chu State ramri buai chungchangah Vawiin, August 9, 2022 hian Aizawl-ah an inbe leh dawn.

Assam Border Protection & Development Minister Atul BoraAtul Bora Private Secretary chuan August 3, 2022 khan Mizoram Chief Secretary leh Home Secretary-te lehkha thawnin, Border Protection & Development Minister hoin Assam leh Mizoram ramri chungchanga inbe turin Assam atangin mi panga an rawn zin dawn thu a hriattir a, ruahman lawk ang chuan Assam Team te hian Vawiin chawhma dar 10:45-ah Aizawl an rawn thleng ang a, zan khat riakin, naktuk August 10 chawhnu dar 2:55-ah Aizawl an chhuahsan leh ang. Border Minister hi Housing & Urban minister Ashok Singhal, Border Secretary leh Border Minister Assistant pahnih­in an rawn tawiawm dawn a ni.

Heng State pahnih aiawhte hi Aijal Club-a inbe tura ruahman niin Assam sawrkar aiawh te hi Assam Border Protection & Development Minister Atul Bora chuan a ho anga, Mizoram sawrkar aiawhte hi Home Minister Lalchanliana chuan hovin I&PR Minister Lalruatkima leh sawrkar mi pawimawh dang te an tel dawn bawk a. Chawhnu dar 2:00-ah inbiakna tanin inbiakna an neih zawh hnuah State pahnih aiawh te hian Press Conference an nei zui dawn a. Heng State pahnih aiawh Minister te hi August 5, 2021 khan Aijal Club-ah ramri chungchang ah hian an lo inbe tawh bawk a ni.

Vawiin-a ramri chungchanga inbiakna an neih tur chungchangah Home Minister Lalchamliana chuan Assam lamin eng thu nge an lo ken dawn an la hriat lawk loh avangin Mizoram pawhin eng thu nge an ken dawn tih sawi lawk theih a la ni rih lo tih a sawi. Nimin-a thuthar thehdarhtu ten an kawmna ah Home Minister hian, Assam hotute chuan Vawiin-a ramri chungchang an sawiho turah eng thu nge an rawn ken dawn tih an zuk zawt tih sawiin, a chhanna an la hmuh loh avangin an thu leh hla la ngaihchan mek a nih avangin an rawn ken tur hriat theih a la ni rih lo tih a sawi a. Assam lam thu lo ken tur chu a har viau thei a, a lo awlsam viau thei bawk a, engmah hriat lawk a la nih loh avangin eng lam hawia inbiakna hi kalpui tur nge tih sawi lawk theih a la ni lo, an thu lo ken a zirin Mizoram lam pawhin an thu ken tur chu an lo siamrem ve mai dawn tih Home Minister chuan a sawi a ni. 

Hemi hmalam hian Home Minister Lalchamliana hian ramri chungchanga inbiaknaah Mizoram tanfung tur chu BEFR 1875 a nih thu te, hei hi Deputy Chief Minsiter Tawnluia kaihhruaia All Party Meeting-in an lo rel tawh a nih thu te leh inbiakremna zawn theih a ni ang ti ang deuha rilrua an dah thu te a lo sawi tawh a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »