CWG 2022 Gold Medalist Jeremy Lalrinnunga Mizoram-ah ropui taka lo lawm a ni

/

Birmingham khawpui-a Commonwealth Games neiha India tana Gold Medal latu Jeremy Lalrinnunga chuan nimin khan Mizoram rawn thlengin Sports Minister Robert Romawia Royte hovin ropui taka lo hmuah a ni.

Jeremy Lalrinnunga hmuahna inkhawm tawi hi Lengpui Airport hungchhunga Chawlhbuk-ah buatsaih niin he hunah hian Sports Minister Robert Romawia Royte chuan Mizoram atanga India aiawha infiammi zinga la thleng sang ber Jeremy Lalrinnunga chuan Mizoram a ti hmingtha takzet tih a sawi a, “Zoram mipui ten kan chhuang a, sawrkar ang pawhin kan chhuangin Mizoram Olympic Association hruaitu ka nihna ang pawhin infiammite zawng zawng aiawhin a chungah lawmthu ka sawi a ni,” a ti. Sports Minister chuan tun tuma Jeremy-a puala programme buatsaih chu Mizoram ti hmingthatu hmuahna leh a hlawhtlinna la lawmsak tur aitechhinna nia sawiin, CWG-a India aiawha Bronze Medal la tu Lalremsiami rawn thlen hunah Sawrkarin  ropui takin CWG Gold Medalist leh Bronze Medalist te lawmpuina hun a buatsaih dawn tih a sawi bawk.

Sports Minister chuan Sports Policy mumal taka kalpui chhoh mek a nih thu te leh hmalakna pawimawh zualte a sawi a. All India leh International Level-a tel thei tura inchher nan SAI Centre a pawimawh tih sawiin,. SAI Centre te hi Central Sawrkar hnuai ni tho mahse Mizoram in kan mamawh belh avangin Mizoram sawrkar chuan siambelh a nih theih nan an nawr mek thu a sawi bawk.

Commonwealth Games 2022 Gold Medalist Jeremy Lalrinnunga pawhin ama lo hmuahna pual programme-ah hian thu sawiin India ram tana a hlawhtlinna te Mizoram mipuiin an lo lawmpui leh sawrkarin ama lo hmuahna programme a buatsaih chu  ropui a tih thu a sawi a. Amah lo tantu leh lo tawngtaisaktute leh Mizoram mipui hnenah lawmthu a sawi a ni.

Jeremy Lalrinnunga hmuahna programme tawi hi Dr. Lalrozama, Secretary, S&YA chuan a kaihruai a, he hunah hian Sports Association hrang hrangin Jeremy Lalrinnunga hnenah hian lawmpuina pangpar leh thuziak te an hlan a ni. He hun hman zawh hnu hian Jeremy Lalrinnunga hi thuthar thehdarhtu ten an kawm nghal a. Hemi hnu hian Aizawl rawn panpui niin lirthei hmangin Aizawl khawpui fanpui a ni bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »