Covid dona atan State Budget zaa pakhat pawh sawrkar in a la seng lo - ZLP Secretary

ZPM Legislature Party Secretary Dr. Vanlalthlana chuan Covid dona atan State Budget atanga chhutin zaah Rs. 1 (cheng khat) pawh sawrkar in a la seng lo niin a sawi.

ZPM Party in nimin-a Aizawl-a an Office-a Chhung Inkhawm an neih ah ZPM Legislature Party Secretary Dr. Vanlalthlana chuan COVID-19 avangin sum kan harsa tih sawi thin a nih thu a sawi a. “COVID-19 dona atan 2020-2021, a tantirh kumah khan Budget atang khan 0.30% (cheng za ah naia sawmthum) an seng a. Kum 2021-2022 Covid hluar em em lai khan 0.64% ( za ah naia sawmruk pali) Budget atangin an seng a ni,” tiin “Covid dona atan hian State Budget atanga chhutin za ah Rs. 1 (cheng khat) pawh sawrkar hian a seng lo,” a ti a. Hei vang hian ‘Covid-ah kan inseng hnem’ an tih hi chu a lo ni lo tawp a ni tih hi mipui ten kan hriat a ngai tih a sawi a. “A dang zawng chu hmun dang atangin a hmu a, kha kha Covid dona atan a lo hmang mai a ni. Engatinge kan buai tak si, Airport siamna atan sum sen a ngai a lawm. Airport siamna atana tuna sum sen zata khu sawrkar Department 30 dawnin budget atana an neih phak loh a ni. Sum siamna atana Budget kan hman avang zawk hian kan harsa a ni tih hi mipui ten kan hriat a ngai,” a ti bawk.

Sum harsatna chungchang sawiin Dr. Vanlalthlana chuan, “Tuna kan CSS sum hetia a chhuak huk tur leh kan sum dinhmun a nghawng dan tur hi Session liamta ah pawh khan ZPM Legislature Party MLA ten kan zawt tawh a, a chhanna erawh kan dawng lo. Nikum kumtir atang khan CSS sum hi sawrkar hnenah a thleng a, sawrkarin pechhuak leh tur a nih laiin thil dangah a pawtpeng a, a lo pawhpenna an dahthatna, K-Deposit ah an dah a, a hminga awm siin a pawisa erawh khawi khawi ah emaw an pawt peng a. A dang a lo thlen hunah kan rul leh mai ang tih a ni a, amaherawhchu, rulh hleihtheih loh te kha a lo awm chho a, ‘Sawrkar hi harh sela tang rawh se,’ tiin kan lo au tawh thin a, muhil der kaihthawh tum hi thil har tawp a lo ni a, kan inkaiharh zo lo a, amaherawhchu, loh theih lohin Central lamin an rawn kuk tho ta a ni,” a ti.

Dr. Vanlalthlana chuan tuna min hruaitu, kan sawrkar neih mek hi an sawrkar hmasaka India ram pumpui a thawhchhuah atanga teh a leiba ngah ber a nih thu pawh sawiin, “Tun Budget Session Budget Speech-ah khan kum li chhunga leiba neih belh tura an inbeisei zat chu cheng vbc. 4500 a ni. Congress sawrkar lai khan kum 10 chhungin cheng vbc. 4700 in leiba a pung a, MNF sawrkarah hian kum li chhungin cheng vbc 4500 in a pung dawn. Hei hi kan sum enkawltute min kalpui dan a ni. Mipuite kan ngaih a tha lo a, chuvang chuan kan auchhuah a ngai a ni,” a ti bawk.