Vairengte - Sairang inkara ram nei nia inchhal ten Kolasib-ah lungawilohna lantirin kawng an zawh

Vairengte - Sairang NH. 6 & 306 4-Land Owners Association-in zangnadawmna-a an harsatna te chinfel sak phutin nimin khan Kolasib Press Club atanga Kolasib DFO Pisa thleng kawngzawh an huaihawt a, hemi hnu hian Kolasib DFO chu kawmin an harsatna te chu GAD thutkhawm neih hunah a lo thlen tur thu a lo hrilh a ni.

Nimin-a kawngzawh an huaihawt hma hian Land Owners Association hruaitute hian Kolasib Press Club-ah thuthar thehdarhtute kawmin, an Chairman James Vanlalringa chuan NHIDCL in Vairengte-Sairang NH. 6 & 306 a laih turah MoRTH in a ruat angin Competent Authority of Land Acquisition (CALA)-in 3A Notification a chhuah tih a sawi a. Kawng zauhna tur atana ram nei zawng zawng, sawrkar Pass leh VC pass nei te tarlan a nih thu leh sawisel duh nei tan hun hawn anih hnuah a nih thu a sawiin, “Sawisel duh nei tan hun hawn anih hnuah 3D Notification chhuah leh a ni a, hemi hnuah CALA thuchhuak angin kawngin a paltlang turte ram endik a ni,” a ti a. Lungawi lohna leh sawi duh nei tana hun hawn a nih chhungin ram neitu leh Mizoram sawrkar atangin sawiselna engmah a awm loh hnuah, CALA chuan 3G turin ruahmanna a siamin, package indawtin NHIDCL-ah 3G pawmpuina dil a nih thu a sawi a, “Zangnadawmna peihfel a nih tawh laiin, tlai khaw hnuah Forest Department in harsatna an siam ta a ni,” a ti.

Land Owners Chairman chuan, Forest Reserved tihah hian Forest Department chuan Town Village a puang vek tawh tih sawiin, Sawrkar hmunhma tam tak, Kolasib DFO Pisa ngei pawh Forest Reserved chhungah a awm tih a sawi a. Forest Department dan tanchhan chu sawrkarin ngaihtuah chiang a, dan hlui tawh hi siamthat emaw/cancel a tul tawha an ngaih thu a sawi bawk.

July 7, 2022 khan Land Owners hruaitute hian Chief Minister hnenah an harsatna te ziakin an then tih sawiin James Vanlalringa chuan, “Forest Minister pawh tum hnih kan hmuh tawh a. Revenue Department chuan CALA hnenah Chief Minister in ti tura a tih angin zangnadawmna pechhuak turin an hriattir,” a ti a, Kolasib DFO chuan ram lak chungchang ah NHIDCL Objection a pek vangin harsatna an tawk ta tih a sawi a. Land Owners hruaitute chuan Mizoram sawrkarin a rang lama an harsatna te chinfel sak tura an phut tih sawiin, Chief Minister bakah Kolasib District chhunga MLA te pawh an harsatna te chinfel sak thuai tura an phut thu an sawi bawk.

Thuthar thehdarhtute zawhna chhangin Land Owners hruaitute chuan, “Forest Clearance an phut rual hian Compensatory Afforestation then mai sela, leilung hlutna kha tuna Revenue pass nei lo leh VC pass nei lo a tam zawk a nih si avangin, kan ram hlutna kha Court-a thlen tura kan tih tunah hian Forest Department hian min thlen khalh a. Tuna ram neitu kum 30/40 chuang kan lo enkawl tawh hi, a ram hlutna chan thei dinhmuna kan ding hi a lungngaih thlak a ni,” an ti.

James Vanlalringa sawi danin, Forest Department in tuna an ram nia an chhal chhunga mimal ram tam tak a awmin, ram neitu chhungkaw 1751 chuang an awm mek a. Forest Department tan chhan Mizoram District Council (Forest Act) 1955/1965 hi dan hlui tawh leh tan chhan tlak tawh loh niin he Dan hi April 12, 2021 khan Guwahati High Court, Aizawl Bench chuan a lo nuai bo tawh niin a sawi.

Thuthar thehdarhtu an kawm zawh hnu hian Kolasib Press Club atangin Kolasib DFO Pisa thleng Land Owners member te hian kawng zawhin, an pawl hruaitute hian DFO chu a pisa-ah an kawm a, zangnadawmna an dawn tura harsatna awmte chinfel sak turin an ngen a. Kolasib DFO pawhin an thu thlen te chu GAD thutkhawm neih hunah a lo thlen tur thu a lo hrilh a ni.