COVID-19 hri kai ni 5-ah chhuahtir theih tawh

Mizoram sawrkar Health & Family Welfare Department chuan Mizoram-a COVID-19 hri kai In lama enkawl te chu ni 5 hnuah chhuahtir theih an nih tawh thu a tarlang.

Hemi chungchang a tun thla ni 12-a thuchhuah an siam ah tunhnaiah COVID-19 hrileng a pun leh viau avangin leh a natna hrik pawh hi a chi thar Omicron Variant, tlema ziaawm deuh a hriat a nih avangin leh CO-VID-19 hri danna Full Dose baka Precautionary dose la mek zel te kan lo awm tak avangin Guidelines awm sa te ennawnin siamrem a ni tih an tarlang a. Natna langchhuak lo (asymtomatic cases) zawng zawng leh natna langchhuak nasa lo (mild cases) khawsik, hritlang, hrawk thip leh khuh nasa lo leh Thawhah nei lo leh an 02 saturation 93 % aia hniam lo te bakah kum 60 chunglam leh natna benvawn nei te chu enfiah an nih hnuah In lama enkawl theih a nih thu an tarlang.

In lama COVID-19 hri kai inenkawl hi ni 5 tur a nih thu leh a tawp lam ni hnih (2) chhunga insawiselna nei lo chu ni 5 hnu hian chhuah tur niin a hnu ni 5 chhung chu strict takin facemask an vuah zui tur tih a tarlang a, ni 5 a tlina insawi-selna (symptoms) la nei chu ni 7 thleng inenkawl hun hi pawhsei tur a nih thu leh hemi hnu lama insawiselna la nei te chu Doctor te thutlukna siam tur a nih thu an tarlang bawk.

In lama hri kai enkawl te chu a theih hram chuan pindan hran thengthaw takah dahtur niin a theih loh chuan midang te nen in awmpawlh lo leh englai pawh a feet ruk (hlam khat) aia hla ah a awm hran reng tur niin chhungte zingah a eiin a in tur a ni lo tih an tarlang bawk a. Home Isolation chenpui te insawiselna neilo leh Covid Vaccine full dose la tawh te chu anmahni eizawnna hna ah CAB uluk taka hmangin an hna chhunzawm phal a ni laiin an chhungte an fihlim hma chuan pui-punna ah erawh inthiarfihlim tura tih an ni thung.