Tui tla la zawng mek zel
VL. Hmangaihzuala zawng hian Thenzawl, Serchhip, Keitum, Buangpui, Zote South, Kanghmun South, Sialsuk leh a chhehvel khaw dang atangin mi tlawmngai te thawkchhuakin nimin khan Mat luidung hi an dap leh a, he thu buatsaih lai thleng hi chuan thu lawmawm hriat tur ala awm lo a, Sairang Dinthar Branch YMA te pawh tui tla zawng tur hian an rawn thawkchhuak tawh bawk a ni. VL. Hma-ngaihzuala chetsualna lai hian Mat-ah hian tui a la tamin ala nu hle a, hei mai bakah hian ruah tam tham tak se a sur leh thin avangin tui tla zawn hna pawh hi duh anga thawh hleih theih a ni thin lo a ni.
Serchhip bialtu MLA Lalduhoma chuan tuitla zawnna hmun hi nimin khan tlawhin VL. Hmangaihzuala chetsualna atanga Chawm kai thleng luidung zawhin tuitla zawngtute zingah a tel a, he chhiatna thleng chu pawi a tih thu leh chhiat tawk chhungkua te a tawrhpui thu sawiin, tui tla zawnga thawkchhuak te chungah lawmthu a sawi a, tui tla pawh a ruang tal an hmuh ngei a beisei thu sawiin, tui tla zawngtute mamawh tur Buhfai bag 2 a pek bakah zan lama chetvelnaa hman atan Generator leh Bulb a tumsak a, Hruizen leh Silpauline te a pe bawk a, hemi hmalam hian Rs. 2000/- a lo pe tawh bawk a ni.
Serchhip-a awm Assam Rifles hotute pawhin Serchhip Sub-Hqrs. YMA kaltlangin nimin khan tuitla zawngtute mamawh tur Buhfai kg. 7, Chini kg. 2, Atta kg. 3, Bawnghnute litre 2 leh thingpuife te an hlan bawk a, heng te hi Ser-chhip Sub-Hqrs. YMA President Kawlthuama leh Secretary PC. Vanlalluna te chuan an lo dawng a ni. Assam Rifles te hian India zalenna kum 75-na lawmna kal zel pualin Serchhip Sub-Hqrs. hnenah hian India Hnam Puanzar pawh an hlan nghal a, nimin vek khan YMA Office-ah hian zar nghal a ni bawk.
Comments
Post a Comment