Serchhip District Bawrhsap in National Flag nei theuh turin chhungkaw tin te a ngen
He thutkhawm Serchhip DC Meeting Hall-a neih ah hian District Bawrhsap Nazuk Kumar chuan, kan ram in Hnam dangte awpbehna hnuai ata zalenna a hmuh champha phak vawi 75-na pualin tun kum kal mekah a lawmna kawng chi hrang hrang kalpui a niin Azadi Ka Amrit Mahotsav (AKAM) tiin sawrkar hmalakna tinrengah he zalenna cham lawmna hi kalpui a ni tih a sawi a. “Kumin-a Independence Day a lo thlen hian sawrkar laipui chuan chhungtinte chu kan chenna In theuhvah India Hnam puanzar chhuang taka lo tara, zalenna cham lo lawm theuh turin min ngen a. Kan Hnam Panzar pawh a thlawna sem ngawt lovin khua leh tuiten neitu nihna nei chung leh he ram tan hian mawhphurhna pawimawh tak kan chelh ve a ni tih inhre chunga man tlawmtea lo lei ve ngei tura min beisei avangin pakhat Rs. 20 chauhva khul theih turin ruahmanna a siam a ni,” a ti a. Ram hmangaihna leh neitu thinlung dik tak pu chunga lo lei ngei turin chhungtinte chu a ngen bakah, a tar hun tura ruatah lo tar ngei turin a sawm bawk.
Bawrhsap chuan India Hnam Puanzar chu chhungtin ten kan neih ve ngei ngei ngai Hnam thil hlu a ni tih sawiin a, tun hun remchangah awlsam leh tlawm taka lei theihna hun a inhawng tih a sawi a, zalenna champha lo thleng tur lawmna atana I tina National Flag zar a nih ngei theih nan leh National Flag neih theihna hun remchang ah mipuite chu Flag hi lo lei theuh turin a ngen a ni.
National Flag hi Block Development Office pahnih E. Lungdar leh Serchhip-ah te pek chhuah a ni tawh a. Khawpui chhung Village Council 14 ah dah ni bawkin VC te hian an bial chhung mipuite hnenah pakhat Rs. 20 zela lei turin an chhawpchhuak dawn a. India ram zalenna champha kum 75 lawmna kal zelah tun thla, August ni 13 atanga ni 15 inkar hian In tinah Hnam Puanzar hi lo zar vek turin sawrkar laipui chuan khua leh tuite a beisei a. Nimin-a thutkhawm ah hian VC kaltlanga hemi kawnga hmalakna leh bawhzui dan turte sawiho a ni bawk.
Comments
Post a Comment