Thla 4 chhungin chhiah Rs. vbc. 328.29 hmu

Mizoram sawrkar-a Taxation Department chuan kumin Apri - July (thla li) chhungin chhiah chi hrang hrang Rs. 3,28,29,88,256 an hmu tling tawh. Hetihlai hian kum kal mek 2022-23 chhung a chhiah hmuh beisei zat (target) chu Rs. 7,30,03,51,000 (vbc. 730.03) a ni.

Taxation Department-in an tarlan danin, an Department hian Chhiah chi li, GST, Profession Tax, Sales Tax leh Entertainment Tax an la mek a, kumin thla li chhungin, GST-ah Rs. 2,94,17,99,308, Profession Tax-ah Rs. 3,71,36,243, Sales Tax-ah Rs. 30,38,65,659 leh Entertainment Tax-ah cheng vbc. 88,876 leh chhiah dang atangin Rs. 98,170/- an hmu tawh a ni.

Sawrkar kum kal mek, April, 2022-ah Taxation Department hian Chhiah chi hrang hrang Rs. 90,46,82,225 hmuin, May thla ah Rs. 93,46,38,881, June thla ah Rs. 80,00,86,741 leh July thla ah Rs. 64,35,80,409 a hmu tawh a, tun thla li 4 chhung a chhiah hmuh tawh zawng zawng chu Rs. 3,28,29,88,256 a tling a. Nikum (2021)-a thla li chhung khan Chhiah hi Rs. 2,71,62,77,977 hmuin nikum aiin kumin hian an Chhiah hmuh hi a tam zawk a ni. 

Kumtin sawrkarin Tax Revenue lakkhawm zat tur a bituk thin a, kum 2021-22 chhung khan chhiah khawn tur a bituk zat chu cheng vbc. 717.13 a ni a, an target chu cheng vbc. 177.71 a khumin an chhiah khawn zawng zawng tling khawm cheng vbc. 894.74 a ni.