Home Minister-in TCZP buatsaih Freshers Social leh zirlai tithate chawimawina hun a hmanpui

Home Minister Lalchamliana’n zirlaite chu lehkhathiam an nih angin thil dik leh dik lo finfiah ching mi, mi tu emaw in ngaihdan chak tak an vawrh darh avanga awih ngawt lova thu dik leh dik lo thliar thiam turin a chah.

Inrinni-a Aizawl Chanmari YMA Hall-a Tuichangral Zirlai Pawl te buatsaih Freshers Social leh zirlai tithate chawimawina hun a hmanpuina ah he thu hi sawiin Hrangturzo bialtu MLA ni bawk Lalchamliana chuan zirlai kalkhawmte chu anmahni, chhungkua leh khawtlangah a tha zawnga danglamna thlen tura an rilru siam thar theuh turin a fuih a, Zirna chu mi puitlinga min siamtu, he khawvela kan damkhawchhuah theihna tura kawng min kawhhmuhtu a ni a, thiamna a san poh leh ram in hma a sawn thin, a ti a. School leh College atanga thiamna an puakchhuah hmangin khawvel ah mahni ke a ding thei tura hmalam thlir tur te, Mizoram Sawrkar hnuai chauha hna dil lo a, Central Sawrkar hnuaia hna tha tak tak awm te thawh tumin a fuih a. Lehkhathiam an nih angin thil dik leh leh dik lo finfiah ching mi, mi tu emaw in ngaih dan chak tak an vawrh darh avanga awih ngawt loa thu dik leh dik lo thliar thiam a, Power of Reasoning leh analysis hmang thiam mi ni turin kalkhawm te a chah a ni. 

Hrangturzo bialtu MLA Lalchamliana chuan Tuichangral Zirlai Pawl te nen an bial chhung zirna tihhmasawnna kawngah leh hmasawnna hna thawh tha zawk leh chak zawka a kal theihnan hma an la ho thin tih a sawi a. Bial chhunga hmasawnna hna thawh te a tha tawk em tih uluk leh taima taka an vil thin chu lawmawm a tih thu a sawi a. Mizoram Sawrkar budget-a awm lo Central Sawrkar atangin SASCI kaltlangin Mizoram in sum a hmuh thu sawiin, an bial chhung inkalpawhna kawng cheithat hna thawh ani dawn tih a sawi bawk.

Tuichangral Zirlai Pawl ten he hun an hmanna ah hian David R. Lalsawmtluanga, Liando Auto Works proprietor chu khualzahawm a ni a, he hunah hian kum 2021 atanga kum 2022 chhunga pawl 10 atanga MA thleng result chhuaka hlawhtling te hnenah lawmpuina thuziak an hlan a. An bial chhunga mi hmingtha chawimawi tlak te chawimawina hun an hmang bawk. 

Tuichangral huam chhungah hian khaw 14 - Bawktlang, Biate, Chekawn, E .Lungdar, Hmunzawl, Khawlailung, Leng, Lungchhuan, Lungkawlh, Mualcheng, N. Vanlaiphai, Piler, Sailulak leh Sialsir khua te a awm a ni.