Serchhip District-a chhungkaw 55 te hnenah NLM kaltlangin ranvulh tanpuina semchhuah a ni
Heng tanpuina semchhuahna puala Inkhawm tawi Serchhip DVO Office Training Hall-a neih ah Serchhip District AH&Vety Officer Dr. R. Lalmakthanga chuan sum harsatna karah sawrkar in hetianga NLM hnuaia tanpuina sum a pechhuak chu a lawmawm zia hre reng tura tanpuina dawngtute chu chahin, ranvulh lamah hmasawnna a thlen ngei a beisei thu a sawi a. National Livestock Mission chuan mimal eizawnna tih hmasawn leh ran chi tha vulha tihpun te chu a tum a ni tih sawiin, tanpuina an dawn te chu a hmanna tura ruahman ah ngei hmang tur leh hmasawnna atana hman tum turin a chah a ni.
He hunah hian Sr. Veterinary Officer Dr. John Lalhnuna chuan tanpuina dawngtute fuihna thu sawiin, dawn ringawt tumna rilru pu lo tur leh hlawhtlin pui ngei theih nan theihtawp chhuah turin a chah a. An hmalakna te enzui hna Department in an thawh dawn thu sawiin, tanpuina dawngtute pawh anmahni bialtu Vety mithiam te rawn thin turin a chah a, an thawhho that chuan an hlawhtlin ngei a beisei thu a sawi bawk. He hunah hian Dr. H. Vanlalrawna VO pawhin he hmalakna hi Mizoram State Rural Livelihood Mission (MzSRLM) nena kalpuiin Insurance kalpui a ni dawn tih a sawi a, a tirah insurance hi tih nghal theih ni lo mah se tanpuina an pek ah a tel avangin lo dahtha turin a chah bawk a ni.
Tun tumah hian tanpuina sum hi Vawk vulh tur mi 35 hnenah Rs. 19,950/- theuh sem niin a vaiin Rs. 6,98,250/- semchhuah a ni a, Vawkpui vulh tur mi 10 hnenah Rs. 1,00,000/- theuhin Rs. 10,00,000/- semchhuah a nih bakah Kel vulh tur mi 10 te hnenah Rs. 62,700/- theuhin a vaiin Rs. 6,27,000/- semchhuah a ni a, a vaiin mi 55 te hnenah Rs. 14,25,250/- semchhuah a ni a, sum te hi Bank Account kaltlanga semchhuah a ni.
Tun tuma Vawk vulh tura thlan mi 35 te hi Thenzawl atangin mi 5, North Vanlaiphai atangin mi 4, Chhingchhip atangin mi 3, Baktawng, Khumtung leh Chhuanthar atangin mi pahnih theuh leh khawdang 17 atangin mi pakhat theuh te an ni a. Vawk note man tur bakah hmanraw mamawh leh Vawk chaw leina turte telin zaa 90 hi CSS niin zaa 5 chu State sawrkar in a tum leh zaa 5 dang chu tanpuina dawngtu in an tum ve tur a ni thung.
Vawkpui vulh tura thlan chhungkaw 10 te hi Chhuanthar leh Serchhip atangin mi pahnih ve ve tih loh chu khaw dang 8 atangin mi pakhat theuh an ni a, Vawk pathum leina tur man bakah Vawk chaw leina turte, damdawi leina tur leh Vawk Insurance tihna turte bakah Tui leh Eng pek tura ruahman a ni bawk.
Kel vulh tura thlan te hi chhungkaw 10 bawk niin New Serchhip, Thenzawl leh Hmunzawl khua atangin mi pahnih theuh thlan an ni a, a bak khaw 4 atangin mi pakhat theuh thlan an ni thung a, Kel pa leh a nu leina tur sum ruahman niin Insurance tihna tur pawh ruahman a ni bawk a, hei bakah hian Kel vulhna hmanraw mamawh leina tur leh ann damdawi leina tur pawh rua-hman a ni a, sum pek atanga zaa 90 hi CSS niin zaa 5 chu State sawrkar tum niin tanpuina dawngtu in zaa 5 an tum ve dawn bawk a ni.
Nimin a tanpuina semna hunah hian ranvulhtute tana hriat tur pawimawh hrang hrang inzirtirna neih nghal niin tunlaia Vawk hri leng mek, African Swine Fever (ASF) chung-chang pawh inhrilhfiah niin hri leng laka ran an him theihna tura pawimawh hrang hrang sawiho a ni a, zawhna leh chhanna hun hman nghal a ni bawk.
Comments
Post a Comment