'Anti-Dengue Month' leh 'World Population Day' pualin Serchhip College-ah hun hman a ni

July thla a hman thin 'Anti-Dengue Month' leh July 11-a hman thin 'World Population Day' pualin nimin khan Govt. Serchhip College-ah hun hman a ni.

Govt. Serchhip College Smart Classroom-a he hun hman hi H. Lalchhanhima, Asst Professor,Dept of Computer Science chuan kaihruaiin Serchhip CMO Office atangin Dr. Samuel-a chuan 'World Population Day' chungchang hi a sawifiah a. Kum 1987 khan khawvel puma mihring chu billion 5 an tlin tawh thu sawiin, hei vang hian World Population Day hi July 11-ah kumtin hman a nih tak thu a sawi a. He ni hi khawvel-a mihring pung chak lutuk thunun nan leh mihring pun dan mila hmasawnna pawh tha zawka a awm theih chu a hmathlir a nih thu a sawi a. Hemi kawngah hian Family Planning chu hmalakna lian te zinga mi a ni tih sawiin, chutihrual chuan Family Planning hian Fa neih tlem ngawt chu a tum a ni lo tih a sawi a. Family Planning chu chhungkaw ruahmanna tihna mai a nih thu leh mitin in he ruahmanna hi kan neih a tul thu sawiin, mihring pung chak lutuk tur venna atan te, retheihna umbo nan leh harsatna dang kan tawh lohna turte chu a thiltum te zinga mi a nih thu a sawi bawk.

He hunah hian Serchhip District Malaria Officer Dr. Lalngaihawmi Chhangte chuan 'Anti-Dengue Month' chungchang sawiin, kumtin July thla ah Anti-Dengue Month hi hman thin ni mah se kumin ah chuan rokhawlhna a awm avangin August thla ah hman a nih tak thu a sawi a. Dengue natna chu Thosi seh atanga inkaichhawn theih a nih thu leh Aedes Aegypti thosi seh atanga ni 5-6 velah a lang chhuak thin a nih thu sawiin, Dengue natna chu Khawsik sang thut, Chal bawr na, Mitmu chhung na, Tihrawl leh ruh chuktuah na, thil ei tui lo, Sentut anga Awm leh ban vel bawl leh Luakchhuak leh luak anga a lanchhuah thu a sawi a, kum 2012 atang khan Mizoram-ah pawh he natna vei hi hmuhchhuah an nih tawh thu leh Serchhip District-ah pawh mi 12 laiin an vei tawh thu sawiin, he natna hi Thosi seh atanga inkaichhawn theih a nih avangin Thosi pian theihna hmun tihbo a pawimawh thu te pawh a sawi bawk. Nimin-a he hun hmanna ah hian Serchhip-a Health Department-a thawktute leh Govt. Serchhip College-a zirlaite an tel a ni.