Mizoram Governor in India ram hmasawnna atan khua leh tui te theihtawp chhuah zel turin mipuite a chah

Mizoram Governor Dr. Hari Babu Kambhampati chuan Vawiin-a ram zalenna ni champha lo thleng ah mipuite chu duhsakna chibai bukin, India ram hmasawnna atan khua leh tui te theihtawp chhuah zel turin a chah a. Independence Day hlim taka hmang theuh turin duhsakna a hlan bawk.

Ram zalenna ni champha puala mipuite hnena thuchah a siamah Governor chuan he hun pawimawh bik a lo thlen hian kan ram leh hnam dinchhuahna atana zalenna sualtu te inpekna thuk tak te kha kan hre thar leh tih sawiin, pawnlam mi, min awp bettute laka zalenna hlu tak min sualchhuah sak avangin an chungah kan lawm em em, a ti a. Tunah chuan India ram chu khawvela mipuite thuneihna leh an aiawh roreltu atana an thlanna ram lian ber a lo ni tawh tih a sawi a ni. Mizoram Governor nihna a chelh atangin kum khat a lo vei tak thu Dr. Hari Babu Kambhampati chuan sawiin, “He hun reilote chhung hian Mizoram hmun hrang hrangte fangin khua leh tui te nena inkawmna hun tha tak te ka nei thin a. Hmasawnna hnathawh tam tak te leh hmasawnna te ka hmuh rualin kan tan lakna tur kawng tam takah ka hmu bawk a. Mizoram-ah hian theihna nasa tak awm mah se heng kan theihna te hi a hlawk tur angin kan la khawrh chhuak lovin ka hria a ni,” a ti.

Governor chuan a thil ngaih pawimawh pahnih sawiin, Kawlphetha siamchhuah chu kan hmalakna pawimawh ber zingah kan dah a ngai tih pawh sawiin, “Keini State lian vak lo, kawphetha siamchhuahna tur tuiluang chakna chhawr tur ngah si hi chu kan intodelh thei a ni,” a ti a. Hei bakah hian Central Welfare Scheme tha tak te Mizoram mipui ten kan hre lo chu a vei em em tih sawiin, “Beneficiary tam takin heng tanpuina sum te hi an chan mek a. Hemi kawngah hian kan harh a ngai a, he Scheme chungchangah hian kan mithiamte tan in lak a ngai a, beneficiary te hnenah heng Scheme hrang hranga hamthatna awm thei te hi nasa taka in sawidarh a ngai a ni,” a ti bawk.

India ram zalenna champha vawi 75-na lawmna (Azadi ka Amrit Mahotsav) neih mek puala Prime Minister Narendra Modi-in ram intodelh a India ram siam tura khua leh tui te hnenah chona leh sawmna a chhawpchhuah chu ropui a tih thu leh India ram intodelhna tur chuan kan awmna apiangah leh kan theihna zawnah theuh tan kan lak a ngai tih Governor chuan a sawi a. “Mizoram pawhin India ram a lo ropuina atan leh a intodelhna tur atan hian thil ropui tak a ti thei a ni. Hemi kaihhnawihah hian kan thalaite an pawimawh zual,” a ti a. Thalai vengva zual leh mahni kutke a dinchhuah tum te tan Pradhan Mantri Mudra Yojana, Standup India leh Startup India hnuaiah te Scheme tha tak tak a awm thu a sawi bawk.

National Education Policy 2020 huanga hmalakna pawh a pawimawh thu Governor chuan sawiin, “ He zirna kalphung thar hian India ram chu khawvel thluakbur-ah siam a duh a ni,” a ti a. Hemi huangah hian kan State hlawhtlinna te chu chhuang hle tih pawh sawiin, Mizoram University leh Pachhunga University College te NIRF Rankings tarlan angin India rama Zirna tha filawr tlemte zingah an lang thei chu a ropui takzet tih mipuite hnena thuchah ah hian a tarlang a ni.

Governor chuan zalenna ni kan lawmna ah hian kan rilru-ah kan ram zalenna sualtute in kan ram tana thiltha nia an hriat te leh an duhthusam te kha vawng nung thar zel tura mipuite chahin, ‘Chi hrang hrang kan inpum-khatna hi kan chakna’ tih hi kan hre reng dawn nia, a ti a. “India ram hmasawnna atan khua leh tui te theihtawp chhuah zel turin kan in chahnawn leh bawk a ni,” a ti.

Independence Day lawmna hi Aizawl ah chuan Chief Minister Zoramthanga hovin neih a ni dawn a, Minister ten District khawpui hrang hrangah an hmanpui bawk ang.

Comments

Popular News (Last 30 Days)

Serchhip DCSO sawn a ni