Ramri chungchanga inbiaknaah ramri hrula huan leh loneituten harsatna tawk lova eizawnna an kalpui remtih a ni

Mizoram Home Minster leh Assam Border Area Development Minister te kaihhruaina hnuaia nimin a State pahnih te ramri chungchanga an inbiakna ah ramri hrula huan leh lo neituten harsatna tawk lova eizawnna an kalpui remtih a ni a, October thla hian Guwahati-ah inbiak leh nise an ti

Ruahman lawk angin nimin khan Assam State sawrkar aiawh leh Mizoram State sawrkar aiawhte chuan Aijal Club-ah ramri chungchanga inbiakna an chhunzawm leh a, inbiakna neih hnua thuchhuah intawm an siamah State pahnih aiawhte hian nikum August ni 5-a inbiakna neih tuma thuchhuah intawm an lo siam tawh chu an la pawm reng tih an tarlang a. State pahnihte chuan ramri-ah remna leh muanna a awm theih nan leh boruak duhawm lo a thlen loh nan hmalak chhunzawm zel an remti a, hemi tihhlawhtlin nan hian ramri hrula awm DC te chuan thla hnih danah vawi khat tal inbe thin turin ruahmanna an siam a. Khawi State emaw zawk zawk thunun pawh ni se, ei leh bar zawnna kaihhnawih, a bikin ramri hrula huan leh lo neituten harsatna tawk lova eizawnna an kalpui remtih a ni a, hetihrual hian hetianga hmala turte chuan ramngaw humhalhna dan dinglai an pawisa tur a nih bakah hma an lak hmain bialtu DC remtihna an la hmasa tur a ni thung a. State pahnihte inbiakna chu October thla hian Guwahati-ah chhunzawm a ni ang a, hetah hian ramri buaina chungchang leh State pahnihin ramri an hauh chinte huamzau takin an sawiho tawh dawn a ni. 

Nikum August ni 5-a State pahnihte inbiak tum khan ramri hnaiha buaina chhuahna hmunah te Police Force te tirhchhuah loh an lo remti tawh a. Thuchhuah intawm an siamah ramri hnaihah te boruak muanawm tak vawnnun an remti ve ve bakah Central sawrkarin Neutral Force a dah chu an thlawp ve ve tih an tarlang a, State pahnihte chuan ramri-a inepna thlenna hmun, Mizoram leh Assam inrina hnaih, Assam lama Karimganj, Hailakanti leh Cachar District-ah leh Mizoram lama Mamit leh Kolasib District-ah te an Forest Official te emaw, Police Force te emaw Patrolling nei tur leh ram luah tura tirhchhuah loh an remti ve ve a, tuna awm chin bak sipai tirh chhuah belh loh an remti ve ve bawk.

Nimin-a State pahnih aiawhte inbiakna ah hian Mizoram State aiawhte hi Home Minister Lalchamliana chuan hovin Information Minister Lalruatkima bakah Home Secretary H. Lalengmawia leh Home Department Official dangten an tawiawm a. Assam State aiawhte chu Border Area Development Minister  Atul Bora-an hovin Irrigation Minister, Cachar District enkawl tura ruat Ashok Singal leh Official te an tel a. Assam palaite hian Vawiin lamah Chief Minister Zoramthanga hmuh leh tumin chawhnu lamah an haw nghal dawn a ni.