Serchhip-ah RD Minister Lalruatkima hovin India ram zalenna ni vawi 76-na lawmna neih a ni

India Independence Day vawi 76-na chu nimin khan ramchhung hmundangte rualin Serchhip-ah pawh Rural Development Department changtu Minister Lalruatkima hovin lawm a ni a. Serchhip Sports Complex-a hemi puala hun hman ah RD Minister hian Hnam Puanzar pawtpharhin Parade Contingent te Chibai buk chu a chhanglet a ni.

Serchhip-a India Indepencence Day lawmna ah hian khuallian RD Minister Lalruatkima chuan India ramin hnam dangte awpbehna hnuai ata zalenna a hmuh theih nana theihtawp lo chhuahtu ram hruaitu hmasa leh zalenna atana mahni nunna hlantute zawng zawng zahna chibai bukin, “An thawhrimna leh inpekna zarah Vawiin-ah chuan India ram chu khawvela Democracy ram lian ber, Economy lian leh ram venhimna kawngah pawh khawvel zahkai kan ni chho ta a ni,” a ti a. He huna kal mipuite chungah lawmthu sawiin, remna leh muanna vawng nunga ram in hma a sawn zel theih nana mahni zawn theuha rinawm taka thawk zel turin a sawm bakah kan ram in hmasawnna a neih theihna tur atana sawrkar in kawng a sial mekah sawrkar tha ti chaktu ni zel turin a sawm nghal bawk a ni.

Minister chuan Mizoram Sawrkar hmalakna hrang hrangte tarlangin, Serchhip District-ah kum kalta chhung khan Police ten thubuai ziahluh 136 neiin heng zinga 102 hi chargesheet niin mi 14 an convict tawh thu a sawi a, hei bakah hian Police ten kum khat chhunga ruihhlo an man chu International Market-a chhutin cheng vbc. 10.82 man zet a tling tawh tih a sawi a. Jal Jeevan Mission (JJM) hnuaiah Serchhip District-a khaw 36 zinga 23 te chu Functional Tab Water Connection pek fel an ni tawh tih sawiin, khaw dang 12 tan buaipui mek a nih thu a sawi a, chhungkaw 6070 te Connection pek fel an nih tawh thu a sawi bawk.

Hei bakah RD Department hnuaiah Khawtetlang-ah cheng nuai 85 senna Panchayat Bhawan sak zawh tawh a nih thu RD Minister chuan sawiin, PMAY-Grameen hnuaiah East Lungdar RD Block-ah mi 200 leh Serchhip RD Block-ah mi 226, an vaiin mi 426 tan In sak tanpuina Target pawmpui tawh a nih thu leh a rang lama sanction tihfel theih beisei a nih thu a sawi a. MzSRLM hmalakna in SHG Member Vawk vulhtute tan Vawk Insurance tihsak tura ruahmanna siam a nih thu leh SHG Member ni lo te pawhin a zar an zo theih dawn thu a sawi bawk.

Minister Lalruatkima chuan Serchhip District-a Chekawn khua ah Green Chekawn Project kalpui a ni dawn tih sawiin, Solar Village tura duan a nih thu leh In tinah Solar Electric Connection pek mai bakah kawtthler zawng zawng Solar hmanga tihen tum a nih thu a sawi a. Serchhip DIET-a Assembly Hall thar cheng nuai 68 senga sak chu peihfel tawh a nih thu leh cheng nuai 215 senga Hostel Building sak mek pawh chak taka kalpui mek a nih thu a sawi.

SEDP hnuaiah kumin hian chhungkaw 1056 te chu nasa taka Vaimim chin tir mek an nih thu Minister chuan sawi bawkin, nikum lama thar zat aia tam tharchhuah theih beisei a nih thu a sawi a. RKVY-RAFTAAR hnuaiah ran chaw siamna, Composit Feed Mill bun thar ah nikum December thla atanga khan ranchaw siamchhuah a nih thu sawiin, PMKSY atangin chungkaw 89 ten an hman tangkai theih tur loneitute tan tuilakna siam mek a nih thu a sawi bawk.

SEDP hmangin Serchhip District-ah Ar vulhtu chhungkaw 29 te hnenah tanpuina pek an nih thu te, Serchhip khawpui chhunga chhungkaw 404 te hnenah In sak tanpuina cheng nuai 1.5 theuh pek an nih thu leh tunhnaiah chhungkaw 947 te hnenah 1st Instalment pek an nih leh tawh thu bakah Serchhip District Transport Office building thar sak mek chu September thla ah hawn hman beisei a nih thu te Minister hian a tarlang bawk a ni.