Hmar Veng FC an champion

Independence Day/Screening Football Tournament 2022 nimin a khelh zawh takah Hmar Veng FC chuan Vengchung FC chu 3-2 a hnehin an champion ta.

Serchhip District Football Association (SDFA) buatsaih Independence Day/Screening Football Tournament 2022 1st Division Final hi nimin chawhnu khan Serchhip Sports Complex-ah khelh niin 1st Division-a point hmu sang ber Hmar Veng FC leh anmahni dawttu Vengchung FC te an inhmachhawn a. Inkhelh tan atanga minute 3-na lekah Zonuntluanga chuan Vengchung FC tan goal khungin Lalfamkima chuan minute 34-ah Hmar Veng FC tan a sut ve leh a. Vengchung FC hian minute 42-na ah Lalhumhima goal khung hmanga hma hruai lehin hei hi minute 47-na ah Remruatpuia goal khung hmangin Hmar Veng FC hian an sut leh a, hun tawp dawn minute 82-na ah Lalawmpuia chuan Hmar Veng FC tan goal rawn khungin hei hi Vengchung FC hian an sut theih tak loh avangin Hmar Veng FC hian 3-2 a hnehna changin an champion ta a ni.

Tun tuma Champion Team Hmar Veng FC chuan lawmman ah Trophy leh Rs. 20,000/- dawngin pahnihna Vengchung FC hian Rs. 10,000/- an dawng bawk a. Best Player atan Lalhunthara (Hmar Veng FC) chu thlan niin goal 9 khungtu Lalthuthlunga (Chhekhnai FC) chu Top Scorer a ni a, Vengchung FC chuan Fair Play lawmman an dawng bawk a ni.

Independence Day Football hi COVID-19 hri leng avangin kum hnih chhung khelh loh a nih hnuah kumin hian khelh leh a ni a, kum 2019-a khelh khan tun tuma Champion ta, Hmar Veng FC hi Final-ah a vanduai zawkah an lo tang tawh a ni.

1st Division-ah AWC FC an awm zui zel dawn :

Tun tum Screening Tournament-a 1st Division Club zinga beisei phak ta lo deuh AWC FC chu tun Season-ah 1st Division-ah an awm zui zel dawn a, AWC FC te hi match 7 an khelh ah point hmu hniam ber dawttu an nih avangin 2nd Division-a pahnihna ni ta Keitum FC-I te nen nimin zing dar 7:00 khan 1st Division Playoff an khel a, he inkhel ah hian AWC FC tan F. Lalhmangaihzuala goal hnih a khung bakah Lalhunruata chuan goal khat a khung a, Keitum FC-I tan Lalthlanawma chuan goal khat khung ve bawkin AWC FC te hi 3-1 in an chak ta a ni.

Heti hian tun Season-ah SDFA hnuaiah hian 1st Division Team 8 an awm leh dawn a, heng te hi Hmar Veng FC, Vengchung FC, New Serchhip FC, FC Serchhip Kawnpui, Chhekhnai FC, Chanmari FC, AWC FC leh Kawn Veng FC te an ni.

Comments

Popular News (Last 30 Days)

Serchhip DCSO sawn a ni