Sawrkar laipui dawr mek

Health & Family Welfare Department changtu Minister Dr. R. Lalthangliana chu Mizoram thil pawimawh buaipuiin New Delhi-ah a cham mek.

Dr. R. Lalthangliana hian niminpiah tlai khan Ministry of Micro, Small & Medium Enterprises (MSMEs) dawrin MSMEs Secretary B.B. Swain leh official pawimawhte a hmu a, Mizorama Industry hrang hrangte tihchangtlunna tur thil te sawipuiin, Luangmual (Aizawl), Lunglei, Cham-phai, Kolasib leh hmun hrang hranga Factory Complex dinna tura department-in Project an thehluhte a sawipui a, anni hian lo tihhlawhtlin ngei an tum thu leh thla hnih hnu velah Union Minister pawhin Mizoram rawn tlawha zin a tum thu an lo hrilh a ni.

Health Minister hian nimin chawhma lam khan Ministry of Ayush-a Joint Secretary D. Senthil Pandiyan leh official dangte kawmin Ayush Directorate hnuaia thawktu hrang hrangte hlawh chungchang leh State sawrkarin harsatna a tawhte a sawipui a. Joint Secretary hian Mizoram chhung hmun hrang hrangah Ayush Dispensary 30 an pek tur thu a lo hrilh a, District hrang hranga Ayush Hospital dinna tura hmalak mek a nih dan te lo hrilh bawkin, Dispensary dinna atan hian ruahmanna te la siam tur a nih thu sawi bawk.

Union Health Secretary Dr. Rajesh Bhushan pawh a Office-ah hmuin Health Department hmalakna chi hrang hrangte an sawidun a. Minister hian Zoram Medical College (ZMC) tihhmasawnna tur chi hrang hrang atana DPR thehluh tawh chungchangte a sawi a. NITI Aayog Member, Health changtu Dr. VK Paul pawh a hmuh bakah Ministry of Mining-a Secretary Alok Tandon kawm lehin National Green Tribunal order avanga Mining lama hmalaka tur atana Environmental clearance a ngaih tak thu leh chumi atana NABET Consultant rawih na tur sum ngaihtuahsak turin a thlen a ni.

Comments

Popular posts from this blog

Volleyball S/F khel dawn