Saihapui V-a Assam School tawpin Mizo School a ding

October ni 23, 2020-a Saihapui ‘V’ huam chhunga mi, Bengali Medium tia sawi thin, Dholakhal LP School (Bengali School) bomb hmanga tihchhiat chu Mizoram sawrkar hmalaknaa Education Department-in a sak that hnuah kumin Academic Session atang khan Saihapui V Primary School atan hman a ni a, kum rei tak Mizoram chhunga hnamdang sikul lo awm tawh Dholakhal LP School erawh kalpui chhunzawm a ni tawh lo.

Thudawn danin, Dholakhal LP School hi Mizoram sawrkarin chei tha a, luah theiha peihfel a nih hnuah Saihapui V-a Mizoram sawrkar sikul awmsa, Saihapui V Primary School chuan thutthleng te dahlutin, an sikul building nen an kartawn thin a, mumal zawkin kumin Academic Session thar, April atang khan an luah lut a ni.

Dholakhal LP School tia hriat thin hi Bomb hmanga tihchhiat a nih hnuah zirlai naupangte leh zirtirtuten an tiltiaksan a, Saihapui V-a leilet enkawltu hnamdangte pawhin Saihapui V Primary School-ah an fate an luhtir deuh vek tawh nia thudawn niin, Assam lam pawhin engmah rawn sawi buai an nei ngai lo nia thudawn a ni. Saihapui V Primary School-ah hian zirlai 46 an awm mek a, Mizoram sawrkarin SSA Teacher pahnih leh Special Trainer pahnih dahin, zirtirtu pali an awm mek a, hei bakah hian Mid-Day Meal pawh tha takin an dawng a, hnamdang zirlai naupangte pawhin Mizo naupangte zir ang an zir ve mai zel niin Saihapui V atanga thudawnna chuan a sawi.

Dholakhal LP School hi Saihapui ‘V’ piaha cheng hnamdang naupangte luhna thin niin, zirtirtute pawh hnamdang vek an ni thin a, sikul building chhe ta chu kum 2010-a Assam sawrkarin a sak a ni.

Comments

Popular News (Last 30 Days)

Serchhip DCSO sawn a ni