PUC in lawmthu sawina nei

Pachhunga University College chuan nimin khan an College Auditorium-ah kawng hrang hranga hlawhtlinna an hmuh avanga lawmthu sawina hun, Thanksgiving and Grand Celebration programme an buatsaih a, he hun hi Mizoram Chief Minister Zoramthanga chuan khuallian niin a hmanpui a ni.

Nimin-a he hun hmanna ah hian Chief Minister chuan Pachhunga University College a lawmpui thu sawiin, North East-ah mai ni lo India ram pum huap pawha lang tham College tha Mizoram in a nei chu chhuanawm a tih thu a sawi a. Hmarchhak State-ah chuan zirna kawngah a tha ber dinhmun hauh pha an ni a, khawtlang rawngbawlna - thisen pek, faina, thingphun uar leh ramngaw humhalh kawngah pawh hmahruaitu an ni a, Academic line chauh ni lo kawng dang tam takah hlawhtlinna ropui tak tak an hmu chho mek a ni, a ti.

Pachhunga University College hian July ni 20-21, 2022 chhung khan National Assessment and Accreditation Council (NAAC) assessment an hmachhawn a, July ni 26, 2022 khan Accreditation A+ Grade pek an ni a, Cumulative Grade Point Average (CGPA) 3.37 an hmu a ni. India Hmarchhaka NAAC A+ College pahnih awm-ah a score sang zawk niin, Hmarchhak College zinga NAAC grading a score sang ber a ni.

Sawrkar laipui Ministry of Education hnuaia India rama zirna sang dinhmun endiktu, National Institutional Ranking Framework (NIRF) in ranking an tihchhuah thar berah College category-ah 45-na dinhmun a hauh phak bawk a, ‘Green Mentors’ Ahmedabad te chuan dinhmun sang ber ‘Platinum Rank’ chu kum 2021-2023 chhung atan pe bawkin ‘District Green Champion 2021-2022’ an ni a, heng bakah hian tunhnaiah chawimawina leh lawmman chi hrang hrang an dawng bawk a ni.