Raltlan tanpuina tur sum inhlanna neih a ni

Myanmar raltlante tanpuina atana Mobile Charity Concert a pawisa hmuhte inhlanna hun chu nimin khan Aizawl-a MZP Conference Hall-ah neih a ni.

MZP Vice President Andrew F. Lalramnghaka kaihhruai a neih ah hian MZP General Hqrs. President Lalnunmawia Pautu chuan khawchhak lama kan unaute hian tanpui an ngai tih sawiin, “A ramchhunga Myanmar sipaite kuttuar a, nunau pawisawi lo te tawrhna hi a rapthlak takzet a. Ei leh bar tur an nei lova, an khua halsak an nih avangin an mangang em em a ni,” a ti a. “Heng Tahan (Kalay Region) leh a chhehvêl tanpuina tura pawl hrang hrangin vehbur kan khawna pawisa lo thawhtu, Zoram mipuite zawng zawng chungah kan lawm a. A let tam takin Pathian in mal a sawm ang tih kan ring a ni,” a ti. He hunah hian MZI President David Z. Hmar pawhin thu a sawi bawk a ni.

Myanmar ramchhung Tahan (Kalay Region) leh a chhehvel tanpui nan Mizo Zirlai Pawl (MZP), Mizo Zaimi Inzawmkhawm (MZI), People United in Music with a purpose (PUMP) leh NGO United for Democratic Myanmar te tangkawp chuan kumin June ni 30, August ni 6 leh August ni 15 khan Aizawl khawpui chhung hmun hrang hrangah Mobile Charity Concert a buatsaih a, he concert atang hian Rs. 5,03,534/- hmuh niin heng sum hmuhte hi nimin khan hlan a ni a, Myanmar chhung Tahan leh a chhehvel-a a mamawhtute tan thawn a ni dawn a ni.

Comments

Popular News (Last 30 Days)

Serchhip DCSO sawn a ni