Mizoram-a School 10-ah Cricket zirna kalpui dawn

Samagra Shiksha Mizoram leh Cricket Association of Mizoram te thawhdunna, Grassroot Cricket School bul tanna Hit-off Programme chu nimin khan Aizawl Chanmari YMA Hall-ah neih a ni.

Nimin-a he hun hman hi School Education Minister Lalchhandama Ralte chuan hmanpuiin Mizote taksa pianphung nena inmil tak, eizawnna tling, Cricket zirna sikul-a kan nei thei chu lawmawm a tih thu leh ke kan pen dik hle nia a lan thu a sawi a. Kumin ah CAM nen Sikul 10-ah thawhho niin nakum ah chuan Sikul 50-ah thawhho leh a ni dawn tih sawiin, tun atanga kum 10 a kal meuh chuan Mizo thalaiten eizawnna tling thiamna neiin National player-ah te pawh an awm nual theih a beisei thu a sawi a. Cricket bul tanna atana thlan Sikul 10 te chu a hmahruaitu an nih avangin inpe tak leh taima taka zir turin a chah a, zirtirtute pawh sikul vannei an ni tih hriaa tan la turin a fuih bawk.

He hunah hian Sports Minister Robert Romawia Royte pawhin Samagra Shiksha leh Cricket Association of Mizoram (CAM) ten thawhhona an nei thei chu lawmawm a tih thu a sawi a, NEP 2020 pawhin Sports hi a ngai pawimawh hle tih sawiin, ram changkangah te chuan School-ah Sports an ngai pawimawh hle a ni, a ti a. Cricket hlutzia sawiin, Sports-ah chuan sum leh pai-a innghahna nei tha, inrelbawlna fel tak nei, CAM pawh sawrkar tanpui ngai lo-a intodelh tak an ni tih sawiin, sum leh pai thawhchhuahna tha an tling tih a sawi a, hetianga belh tlak Cricket zirna School-ah neih a ni thei chu lawmawm a tih thu a sawi bawk.

He hunah hian Lalhmachhuana, SPD Samagra Shiksha chuan report pein Samagra Shiksha Mizoram leh Cricket Association of Mizoram te chuan thawhhona thuthlung (MoU) chu April 12, 2022-ah an ziak a, he thawhhona thuthlung hi kum 5 chhung daih tur a ziah a ni. He MoU ang hian Aizawl khawpui chhunga sawrkar Slementary School 10-ah Grassroots Cricket School tiin bul tan a ni dawn a, School tinah zirlai mipa 40 leh hmeichhia 10 zel an awm anga, kumthar atangin District dangah pawh kalpui zel tum a ni a, Sikul zirlai tibuai lo turin kar khatah vawi hnih emaw, vawi thum emaw training an nei thin ang. Hemi atana sum leh pai senso ngai zawng zawng leh Cricket thuam thil leh training-na atana mamawh zawng zawng Cricket Association of Mizoram ten an tum a, a bak tul dang zawng chu Samagra Shiksha, Mizoram-in a tum ang.

Grassroots Cricket School-ah hian Qualified Coach dah vek an nih bakah, School tinah School Coordinator ruat an ni a, naupang talent nei tha zual te kumtin National Cricket Academy Bangalore-a training an neih dan tur kawng zawn a nih dawn bakah, Mizoram pawnah Exposure Tip neihtir thin an ni bawk ang.