Chief Minister hovin Independence Day hman a ni

India Independence Day vawi 76-na lawmna chu nimin khan Aizawl Lammual-ah Chief Minister Zoramthanga hovin neih a ni.

Chief Minister Zoramthanga hian nimin zing dar 8:00 khan India Hnam Puanzar pawtpharhin Parade Contingent 28 te chibai buk a chhanglet a, mipuite hnenah thuchah sawiin, India ram hmun hrang hranga Independence Day lawmtute leh Mizoram mipuite chibai bukin duhsakna a hlan a. Kumin Independence Day hi India ramin zalenna a hmuh champha vawi 75-na a nih angin a lawmna Azadi Ka Amrit Mahotsav pualin sawrkar Department hrang hrang ten programme an buatsaih tih sawiin, he ‘Year of Amrit Festival of Independence’ hi mipuite thinlungah ram tana inhlan thar lehna thlentu ni se a duh thu a sawi a. Hruaitu hmasate inpekna leh India ram tana an inhlanna hlutzia hre rengin anmahni zahna lantira, an hnathawhte chhunzawm turin mipuite chu theihtawp chhuah turin a sawm a ni.

Chief Minister chuan sawrkar hmalakna hrang hrangte tarlangin, heng zingah hian kum 2021-2022 chhungin SEDP hnuaiah Mizoram leh Assam ramri-a sipai te riahna tur (barrack) sak a nih thu leh Special Assistance to State for Capital Expenditure Scheme hnuaiah 3rd IR Bn. Hqrs, Thingkah, Lawngtlai District-ah tui thianghlim in tur pekna tur cheng vbc. 6.90 ruahman niin, sum hi hnathawktu tur PHE Department kutah hlan a ni tawh tih a sawi a. P&E Department hnuaiah Special Central Assistance to State for Capital Expenditure hnuaia sum hmuh cheng nuai 1,690 hmangin Lunglei Kawmzawl-ah Sub-Station thar sak zawh tawh a nih thu leh SEDP pawisa cheng nuai 795.76 hmangin East Lungdar-ah Sub-Station thar sak a nih bakah Bukpui-Khawzawl Line thawmthat a ni tih a sawi.

PHE Department chuan Jal Jeevan Mission (JJM) hnuaiah kum 2020-2022 chhung khan thingtlang mihring chenna (rural household) 1,34,028 awm zat atanga 85,231 hnenah tui connection ‘Functional House Tap Connection’ (FHTC) an pe fel tawh tih pawh Chief Minister chuan sawiin, thingtlang khaw 177 tuamchhuah a nih tawh thu leh khawpui (urban areas)-ah tui connection 1,13,800 pekchhuah tawh a nih thu a sawi a. Mizoram sawrkar chuan Power Grid Corporation India Limited nen MoU ziakin khum 100 dahna tur Serchhip District Hospital sak tum a nih thu a sawi bawk.

Heng bakah hian Khawzawl, Serchhip, Mamit, Lawngtlai leh Aizawl District-ah uar zawka lakhuihthei chinna kalpui a nih thu leh Tlabung, Serchhip leh Vairengte-a Commercial Vehicle Terminal sak hna ngawrh taka kalpuiin kumin chhunga zawh beisei a nih thu te pawh Chief Minister hian a tarlang bawk a ni.

Comments

Popular News (Last 30 Days)

Serchhip DCSO sawn a ni