Project - Mizoram '22 bungrua te CM in hlanchhawng

Myanmar atanga Mizoram-a raltlan hmun hrang hranga awmte chhawmdawlna tur medical bungrua hrang hrangte chu nimin khan BN Hospital & Research Centre hnena hlanchhawnna neih a ni.

Mizo Students Union (MSU) General Hqrs. buatsaiha ‘Project-Mizoram '22’ (Covid-19 Relief Medical Equipment/Supplies) hnuaia chah chhuah heng bungrua inhlanna hun Hotel Floria Roof Top, Dawrpui-a neih hi Chief Minister Zoramthanga chuan hmanpuiin Project Mizoram hlawhtlinna atan MSU te, USA lama an thawhpui te leh mi dang dangin theihtawp an chhuah hnuah bungraw hlanchhawnna neih a ni ta chu lawmawm a tih thu leh an hmalakna chu fakawm a tih thu a sawi a. Heng bungrua te hi a mamawhtu ten tangkai taka an hman nan theihtawpin hma la chhunzawm a, he hmalakna hlawhtlinna a lo lan belh zel a beisei thu a sawi. Chief Minister chuan bungraw chahtu te'n an bungraw chah chu Medical thil a nih avanga a dawngthleng tur (consignee) atan Hospital an awm a tul avanga inhawng taka BN Hospital in consignee nih an lo inhuam chu lawmawm a tih thu a sawi bawk.

Chief Minister chuan India ram chu raltlan te lo dawngsawng thei tur ram signatory a nih ve loh avanga he hmalakna pawh hian harsatna a tawh phah a sawi a. Myanmar atanga raltlan te chu sawrkar laipui chuan an lo luh remti lo in, kir tir leh tur tiin thuchhuah a siam a, chutianga sawrkar laipuiin thu a chhuah tawh chuan State tan pawhin zawm loh ngam pawh a ni lo tur chu a nih rualin, Mizoram chuan Legislative Assembly House-ah a puih zel tur thu a declare tak thu a sawi bawk.

Project Mizoram hi Mizoram-a Burma unau raltlan awm te leh Mizo mipuite puala Covid-19 puala Medical Equipment a thlawna sem chhuak tura project kalpui a nih dan te, khawvela Medical Equipment semchhuaktu lian Project C.U.R.E. (Commission on Urgent Relief and Equipment), Denver, Colorado a innghat te leh Myanmar Refugee Relief Committee, Mizoram, R2P Myanmar Way, BN Hospital & Research Centre Mizoram, Arizona Falama Christian Church, Chin Baptist Association, North America te nena he project hi kalpui a ni dan te he hunah hian tarlan a ni a. Tuna a hmasa ber atana damdawi bungrua lo thleng hi India pawisa chuan nuai 300 chuang hu a ni.

He hunah hian Chin State-a Ex- Chief Minister Salai lian Luaileh MSu hruaitute pawhin thu an sawi bakah MRRC-M Chairman Vanlalchhana, Project Cure/R2PM atangin Philip Htoon leh MSU General Secretary Samuel Zoramthanpuia ten report an pe a, Medical bungrua te hi Camp-a dah theih thil a awm laiin Technician te khawih ngai a nih avangin raltlante awmna District hrang hranga Hospital-ah dah a ni ang.