Latest News

Assam Minister ten Chief Minister an kawm; State pahnih CM ten inbiakna neih an tum

Chief Minister Zoramthanga chuan ramri buai chingfel turin theihtawp an chhuah dawn tih a sawi.

Mizoram sawrkar nen ramri chungchanga inbiakna nei tura Mizoram-a rawn zin Assam State Border Area Development Minister Atul Bora leh Irrigation Minister, Cachar District enkawl tura ruat Ashok Singal-te chuan nimin chawhma lam khan Chief Minister Zoramthanga chu a chenna Bungalow-ah hmuin inkawmna an nei a, he hunah hian Assam-Mizoram ramri chungchang sawiho niin Chief Minister Zoramthanga chuan ramri buai chingfel turin theihtawp an chhuah dawn tih lo sawiin, niminpiah lama inbiakna hlawhtling tak neih a nih chu lawmawm a tih thu a lo hrilh a, State pahnih sawrkar leh mipuite inkarah inhriatthiam tawnna leh inrintawnna a awm zel a pawimawh tih sawiin, ramri buai chingfel tur chuan hun an duh rei dawn a, harsatna awm zawng zawngte vawilehkhat-ah a vaia chinfel theih ni lo mah se, a tahtawlin chinfel vek kan tum tur a ni, a ti a. An inkawm lai hian Assam Chief Minister Himanta Biswa Sarma chuan Chief Minister hi rawn bia in Zoramthanga chuan Chief Minister Level-ah inbiak a that thu a lo hrilh a, kumin August thla tawp emaw, September thla tir lamah emaw hun remchang a awm chuan New Delhi-ah inbiak an remti dun a ni.

Chief Minister Zoramthanga chuan Mizoram tharchhuah Kuhva te Assam lamah Police in an lo man thin chu pawi a tih thu sawiin, Mizoram tharchhuah chu Assam mi leh sa te tho in an lei thin a, khawchhak lam atanga dan lova rawn phurhluh nen hriat hran a har lo em em tih a sawi a, khawchhak lam atanga rawn kal chu a ro a ni a, Mizoram tharchhuah chu a ro ve hman lova, a la hring reng a, a hmel en ringawt pawhin awlsam takin a hriat hran theih a, hei hi Assam sawrkarin ngai pawimawh se, dan dik taka hralhchhuah a nih vangin Assam Police ten harsatna siam tawh lo se a duh thu leh anni pawhin lo ngai pawimawha lo enzui turin a chah bawk a ni.

He inkawmna ah hian Assam Minister te hian Chief Minister Zoramthanga chu Politician tawnhriat ngah tak a nih avangin a chungah rinna an nghat tih an sawi a, ramri buai chungchang chu State pahnih mipuiten an pawm tlan theih tura chingfel turin theihtawp an chhuah dawn tih an sawi ve bawk a ni.

Comments

Popular News (Last 30 Days)