Fisheries Minister in Mizoram mamawh a thlen

National Fisheries Development Board, Governing Body Annual General Meeting vawi 9-na chu nimin khan National Agriculture Science Complex, New Delhi-ah neih niin Mizoram atangin Fisheries Minister K. Lalrinliana chu a tel a ni.

He Annual General Meeting hi Union Fisheries Minister Parshottam Rupala chuan kaihruaiin Fisheries Minister K. Lalrinliana chuan Mizoram in luidung nungcha khawina leh humhalhna a hma a lak dan sawifiahin, tlangram cheng ten harsatna an tawh te a thlen a. Tlangram-a Sangha Dil te chu lui tui luang nasa in a tihchhiat fo thin avangin Dil siamthat a ngai fo thin tih sawiin, hei bakah hian sawrkar enkawl Fish Farm-te thuamthat a tul tawh thu leh Fish Farmers ten tangkai zawka inzirnan an hman dan tur ruahmannate a thlen bawk a ni.

Fisheries Minister chuan Mizoram sawrkarin kan ram luidung/ tualto Sangha (Indigenous Species) te tipung tura hmalakna a neih te leh Chakai tihpunnna atan Experimental Farm an siam dante a sawi a. Heng atan hian India ram hmundanga PMMSY Scheme hnuaia tanpuina an pekchhuah anga tanpui ve turin a ngen bawk a. Mizoram sawrkarin luidung nungcha humhalh nan Mizoram Fisheries Act leh Rules an siam tawh thu leh hemi hlawhtlin nan hian Mizoram-a NGO lian ber YMA te nen thawhhona thuthlung an siam thu sawiin, tlawmngaia thawkte tha tihchak lehzual a nih theih nan tanpuina awm theite ngaihtuahsak turin a ngen bawk a ni.

Heng bakah hian Mizoram-ah ngei Fish Festival buatsaih a nih theih nan te, Administrative Fund leh State leh District-a Programme Unit -te PMMSY hnuaia siam a nih theih nan te he Meeting-ah hian Minister hian ngenna a thlen bawk a ni.