Mizoram Resource Mobilization Committee ten an hmalakna chungchangah Chief Minister an kawm

Mizoram Resource Mobilization Committee te chuan a vawi hnihna atan nimin khan Chief Minister Zoramthanga chu a Office-ah kawmin, an hmalak tawhna leh hmalak leh zelna tur an sawipui.

Kumin January thlaa sawrkarin a din, Mizoram Resource Mobilization Committee hi an din tirh January ni 21, 2022 atangin vawi 9 an thukhawm tawh a, hei bakah hian Consultation Meeting vawi 3 nei tawhin Sawrkarah rawtna hrang hrang an thlen tawh a. An rawtna te sawrkarin tha taka a bawhzui thin avangin Chief Minister hnenah hian lawmthu an sawi a. An rawtna anga sawrkar Office te Bank Account-a pawisa pung sawrkar sum bawma chhunluh chu cheng vbc. 37 zet a tling tawh a. DC Aizawl hnuaiah Mizoram Public Demand Recovery Act, 2001 kengkawhtu 'Certificate Officer' turin Addl. DC dah a ni tawh a. Picnic Spot te, Catering Service leh Spa-ah te GST lak a nih theih nana mumal taka regulate an nih theihna tura Allocation of Business Rules 2019 hnuaiah Tourism kuta dah a ni ta te chu lawmawm an tih thu an sawi a. Agriculture LSC/Periodic patta te In hmuna leh (convert) dawna ram 30% emaw 40% emaw surrender ngai thin, hun engemaw chhung atana tihtawp an rawtna bawhzui mek a ni a, State-a leilung hausakna, GST lakna tur items ni si, kan lak ve ngaih lohna - lung, rawra, etc. ah te lak ve ni se tia an rawtna te pawh sawrkarin a bawhzui mek a, chak zawka bawhzui ni se an duh thu Chief Minister hi an sawipui bawk a ni. Department hrang hrangte'n an sum hmuh (receipt) online hmanga pek theihna siam tur leh Computerised System hmang tura an tihna chu Department lamin an zawm tha vak rih lo niin an hria a, chak zawka hma lak ni se an ti bawk.

MRMC chuan Mizoram lui pawimawh tak, Aizawl khawpui tui tlan ber, Tlawng lui chu enkawl a ngai hle nia sawiin, hemi kawnga sawrkarin ‘Save Tlawng River’ programme a siam chu tha an tih thu leh he thila mawhphurtuten he programme hi chak tak leh rah chhuah tha tak neia kalpui a nih theih nan hemi atan hian kan tui bill atangin 5% cess lak ni se tha an tih thu an sawi bawk a ni.

Chief Minister hian MRMC te hi tha taka lo dawngsawngin an hmalakna ah lawmthu a hrilh a. Hmachhawp hrang hrang sawipuiin, chak lehzuala hmalak a nih theih nan theihtawp chhuah a inhuam thu leh sawrkar pawh a inhuam thu a hrilh bawk a ni.