Finance Deptt. in sum dinhmun an sawifiah

Treasury khar thak dinhmun kan thleng lo - Finance Department

Mizoram sawrkar-a Finance Department chuan Mizoram sawrkar in sum leh pai chungchang harsatna a tawh chungchang sawifiahin, “Treasury khar (payment stop) thak dinhmun erawh chu kan thleng lo,” an ti a. Sawrkar hnathawkte hlawh pawh August ni 10 velah pekchhuah tum a nih thu tarlan a ni.

Mizoram sawrkar Finance Department in Mizoram sawrkar sum chungchanga thuchhuah a siamah hian kum 2019-20 kum tawp lam atanga 2020-21 chhunga kan sum dawn tura ngaih dawn loh tam tak a awm thu leh a hlawm lian chin ringawt pawh cheng vbc. 2632.58 lai niin hemi nghawng hi kan la tuar mek tih tarlan a ni a, heng hunlai hi Covid hri hluar vanglai niin, Central atang pawhin sum fai-a tanpuina te chu dawng ve bawk mah ila cheng vbc. 100 pawh a tling thathum lova, kan sum hmuh tur kan dawn tak si loh nena khaikhin phei chuan a beitham hle tih leh hri leng dona kawng hrang hrangah ruahman lawk lova sum hmanna a tam thu te pawh tarlan a ni.

Hei bakah hian July ni 1, 2021 atangin Centrally Sponsored Scheme (CSS) hnuaia sum te chu Public Financial Management System (PFMS) kaltlanga pekchhuah zel ni tawhin, Implementing Agency-te Single Nodal Account-ah an pawisa pawh dah zel thin tura tih a ni a, hemi a nih avang hian Mizoram sawrkar pawhin September 2021 atangin CSS sum te chu PFMS kaltlangin SNA-ah a dahlut ve ta bawk a, sum dinhmun a harsat chang erawh chuan dahluh nghal mai remchan loh chang a awm thin tih tarlangin, “July 2021 hnulama CSS sum lutte hi kalpui tha viau mah ila, tunhma lama CSS sum dawn tawh, chhan hrang hrang avanga Implementing Agency hnena pekchhuah loh tam tak State engemaw zatah a la awm a, chu chu hriain July ni 7, 2022 khan Central sawrkar chuan March ni 31, 2022 hma lama sum release-te chu Single Nodal Agency-te account-ah July ni 20, 2022 ral hmaa dahlut vek turin state zawng zawng a hriattir ta a, dahluh bangte chu Consolidated Fund of India-a refund turin a ti bawk. Hetiang a nih avang hian Mizoram pawhin CSS fund March ni 31, 2022 hma lama dawn tawh, la release lohte chu chhuah an ni ta char char a, tun chawlhkar hnih chhung lek khan cheng vbc. 610.69 zet chhuah a ni. Hun rei lo te chhunga heti zah zah release chu sorkar sumin a daih loh avangin Ways and Means Advance/Special Drawing Facility hmangin RBI-ah sum pûk a ni a, chu chuan a la daih loh vangin overdraft hmanga sum pawh pûk a ni,” an ti.

Hetianga Sawrkar sum dinhmun a chhiat chhoh tak zelah leh Overdraft atanga sum puk hial a ngaih takah chuan dinhmun chhe zawka kan awm loh nan Treasury atanga Sawrkar sum chhuak te chu nasa taka titlemin Treasury khar (payment stop) thak dinhmun erawh chu kan thleng lo tih Finance Department thuchhuah chuan an tarlang, Treasury khar tak takah chuan sum chhuak tur a awm theih loh thu leh tunah erawh chuan sum pekchhuah a awm thu an tarlang a ni.

Hetiang dinhmuna kan din avang hian a hun takah sawrkar hnathawk te July thla hlawh chu pek theih a nih tak loh thu leh sawrkar chuan pawi a tih thun tarlangin, Sawrkar chuan sum luh theihna dang dang te dapin Revenue Earning Department te pawhin an sum hmuh te Sawrkar account-a dahlut thuai tura tih an nih ang leh Central sawrkar atanga sum release thar tur leh realese mek PDRDG leh Share of Taxes lo lut mai turte hre reng chungin Sawrkar chuan a hnathawkte hlawh pek thuai a tum tih a tarlang a, Muster Roll leh Work Charged-te hlawh chu August ni 5-ah chhuah nghal vek nise tiin, Pension leh Sawrkar hna-thawk hlawh te pawh August ni 10 velah chhuah a tum bawk tih an tarlang a ni.

Finance Department thuchhuah chuan thla thum/thla li hnuah chuan kan harsatna zualpui hi chu sutkian leh theih beisei a ni tih pawh tar-langin, sawrkar hnathawk leh mipuite chu chi ai lutuk tur a ni lo tih an tarlang bawk a ni.

Comments

Popular posts from this blog