Mizoram Rajya Sabha MP in President kawm

Mizoram Rajya Sabha MP K.Vanlalvena chuan niminpiah India President thar Droupadi Murmu-i chu a Office Chamber-ah hmuin Mizoram mamawh thil thenkhat te President hnenah hian tawngka leh ziakin a thlen a, President hi Mizo puan a hlan nghal bawk.

Mizoram Rajya Sabha MP hian India independence hnu kum 75-na leh Mizoram-in State a hmuhna kum 35 hnuah pawh Mizoram chu India rama ziak leh chhiar thiam percentage sang tak neitu a ni chungin Union Public Service Commission (UPSC) Member pakhat mah Mizote zingah ruat an la nih ve ngai loh thu leh tunah hian post pathum ruak mêk a awm thu te sawiin, he post ruakah hian Mizo pakhat tal dah ve turin India President hnenah hian ziak leh tawngka in a thlen a. National Commission for Schedule Tribe Chairman post leh Member post pawh a ruah mek thu leh heng post ruak te hi Tribal kan nih ve avang pawhin Mizo ten luah ve kan phua a hriat thu President hnenah hian a sawi bawk a ni.

Heng bakah hian Rajya Sabha MP K. Vanlalvena chuan India Independence atanga kum 75 ral hnuah pawh Mizote zinga pakhatmah Governor atana ruat an la awm loh thu India President hnenah hian a thlen bawk a. Chutih laiin kum reilote chhungin Governor tam tak Mizo-ram-ah an rawn dah tawh lawi si hi Mizo mipuite rilru ah Governor ngaihhlutna a tih hniamtir thei a ni, a ti bawk. President chuan heng a thu thlen te chu Prime Minister a lo sawipui tur thu a sawi a ni.