Ainawn Veng-a Sawrkar Quarters te enfiah a ni

Revenue Minister Lalruatkima chuan nimin zing khan Aizawl Ainawn Veng-a sawrkar quarters hlui tawh deuh leh chenna tlak tawh lo ni a report te chu a hmunah kalin a endik.

Revenue Minister Lalruatkima chuan Ainawn Veng-a Quarters's Allottee te chuan niminpiah kahn Chief Minister hmuin an harsatna te hi a rang lama ngaihven chi nia a lo hriat sak avangin hmanhmawh takin Official te nen an endik tih sawiin, an endikna report te pawh hi Chief Minister hnenah thlen leh a ni ang, a ti a. Vengchhung Local Council hotute leh Quarters' Allottee Welfare hruaitute nen Type-I, Type-III leh Type-IV te enin Type-I zinga engemaw zat chu hmanhmawh deuh a siam ngaiin an hria a ni.

Govt. Complex tih thin, tunhnaia Ainawn Veng tih takah hian sawrkar Quarters tam tak a awm bakah mimal chenna In engemaw zat a ding tawh bawk a. Hemi chungchang hi sawrkar chuan ngun takin a ngaihtuah mek a. LR&S (Revenue Department) lamin ramri kham dan tur vel a teh hnuah GAD hnenah report a thehlut zel a, GAD hian helai hmunhma chungchanga sawrkar kal zel dan tur ruahmanna a siam dawn tih Minister chuan a sawi a. Tun dinhmunah hna thawh tur zinga tam zawh chu zawh a ni tih a sawi bawk. Revenue Minister chuan Ainawn Veng mipui leh Local Council te chu an veng chhung hmasawn zel dan kalpui tura sawrkarin hma a lak mek avangin sawrkar official te hnathawh ti khaihlak lo tur te, sawrkar Quarters te nekchep zawng hna thawk lo tur leh veng dang atanga insak rawn tum te lo khap rih turin a chah bawk a ni.

Tun dinhmunah Ainawn Veng-ah hian Sawrkar Quarter 184 a awm mek a. Heng te hi Type-I 88, Type-II 56, Type-III 24 leh Type-IV 16 te a ni a. Phalna nei a Quarter luah chhungkua 125 leh phalna nei lova Quarters luah chhungkua 43 an awm a. Quarter structure a him tawk loh avanga allotment siam phal tawh loh Quarters 10 leh a chhiat deuh tawh avanga allottee ten an Quarter luahlai nena an luahkawp 7 te a awm bawk a ni.