Mizoram in sum enkawl thiam ram hruaitu kan mamawh - MPCC

Mizoram Pradesh Congress Committee (MPCC) chuan, “Finance Minister Pu Zoramthanga kutah Mizoram sum leh pai a him lova; Mizoram in sum enkawl thiam ram hruaitu a mamawh,” an ti.

Inrinni-a Aizawl Press Club-a thuthar thehdarhtute an kawmna ah MPCC Media Chairman Dr. Lallianchhunga chuan, “Zoramthanga kaihhruai MNF sawrkar hi a tlaran zawnga a chet avangin Mizoram sum leh pai dinhmun pawh ICU-ah hial dah a lo ngai ta a, Treasury khar hming pu ngam si loin sawrkar Treasury-te hian pawisa pekchhuah tur an nei lova. Heti khawpa kan sum dinhmun a chhiatna chhan chu State khat chhungkaw pa ber, Chief Minister-in inrenchemna awm miah lova mipui pawisa (public money) a duhsak zawngte nena inthuruala a hman teuh teuh vang a ni,” a ti.

MNF Party hotute chuan Mizoram sum dinhmun chhia hi thup an tum nasa hle nia sawiin, “Kan dinhmun a tha niin an la sawi lui reng a ni. Kan sum dinhmun hi a tha a nih chuan sawrkar hnathawk hlawh a hun takah pe sela, an GPF hrensak tawh lo se, pension a chhuakte hnenah pension sum pe nghal bawk sela, Contract bill tang zawng zawng leh Health Care hnuaia damlo bill tang zawng zawng pe vat rawh se,” tiin MPCC Media Chairman chuan a sawi a. “Mizoram sum dinhmun chhe ta lutuk hi Home Minister emaw, Sports Minister-in emaw an sawifiah chi a ni lo a, Finance Minister Pu Zoramthanga ngei hian thil awmdan dik tak sawifiahna - White Paper a tichhuak ngei tur a ni zawk. Treasury-ten chawlhkar khat chuang pawisa an pekchhuah theih tawh loh laia Finance Minister-in engmah a la sawifiah duh lo hian a mawhphurhna a lak thutak lohzia a tilang chiang hle a, Pu Zoramthanga’n Mizoram sum dinhmun a sawi thin dan hi nuihpui chi a ni tawh lo a; thinrim nachang kan hriat a hun tawh zawk a ni,” a ti bawk.

Congress Party chuan Mizoram sum leh pai dinhmun an siam tha nia sawiin MPCC thupuangtu chuan, “Kum 2016-17 budget kha State kan nih hnua Surplus Budget kan neih theih tan kum a ni a. Kum 2016 June 30 hnuah RBI atanga Ways & Means Advance (WMA)-a pawisa puk ngai lo khawpin Mizoram sum dinhmun a tha chho,” tiin Revenue surplus hi MNF sawrkar hnu kum 2019-2020 atangin a tlakhniam nghal thu pawh a sawi bawk a ni.

Zawhna chhangin Dr. Lallianchhunga chuan Mizoram sum harsatna sukiang turin hna hmanhmawh thlak ni lemlo, mahse sum tam tak tak hmanna te chu thawh hrih loh nise, tul lem lova induhsak vanga hna lak thin pawh titawpin kumtin SEDP Board 14 te tana cheng vbc. 2 hmanna pawh tihtawp nise an duh tih chanchinthar thehdarhtu te a hrilh bawk.