Kum 5 chhungin chhungkaw tin te mahni ke a ding thei tura puih kan tum - ZPM Leader

ZPM Leader Lalduhoma chuan, “Kum 5 chhungin chhungkaw tinte mahni ke a ding thei tura puih hi kan tum a ni,” a ti.

ZPM Leader Lalduhoma hian kar kalta khan Tuichang bial chhunga khaw hrang hrang a fanna ah he thu hi sawiin, “Kan ram ah thingtlâng kuthnathawktute kan ding chhuak thei lova, kan rethei telh telh a, hei hi kan thatchhiat vang te, rem kan hriat loh vang te a ni lova, kan sawrkar hrawn mekin kuthnathawktute leh ram leh hman hmasawnna aia mahni pumpui an hmangaih zawk vang a ni,” a ti a. “Eiru te leh dan bawhchhetute pawh zalen takin tuallai an leng a, sual a pung nasa em em a ni,” a ti bawk.

ZPM Leader chuan ‘ZPM chuan Pathian leh mipui zara rorelna kan chang a nih chuan kalphung thar, mipui sawrkar kan din dawn’ an ti thin tih sawiin, “Chumi avang chuan thil thar tha zawk ram leh hnam dinchhuah theih nan thil thar tha zawk kan mithiam rualte nen kan duang lawk vek tawh a. Kum 5 chhungin chhungkaw tinte mahni ke a ding thei tura puih hi kan tum a ni,” a ti. “Kan ram per capita income tehna chu sawrkar hnathawkte hlawhah a ni a, kuthnathawktute kan sum lakluh a mumal loh avang leh a beitham em avangin kan per capita income a sang thei thin lo a ni. Kuthnathawktu ten mumal zawka hna kan thawh a, a market hre saa hna kan thawh dawn avang leh a hralhnaa kan buai dawn tawh loh avangin kan per capita income pawh a sang chho zel dawn a ni,” a ti bawk.

Comments

Popular posts from this blog