Deputy Chief Minister in Khawzawl-ah DCPU Office leh Thisen dahkhawlna bun thar te a hawng

Deputy Chief Minister Tawnluia chuan Inrinni khan Khawzawl ah District Child Protection Unit (DCPU) Office hawngin Blood Storage Centre a hawng nghal bawk.

Khawzawl District Child Protection Unit (DCPU) Office hawnna hunah hian Deputy Chief Minister chuan Khawzawl khua chu District thar zinga DCPO Office nei hmasa ber an ni tih sawiin, lawmawm a tih thu a sawi a. Juvenile Justice Act hmanga naupangte humhimna kengkawhtu tur DCPO Office a awm thar chu hmasawnna hlu tak a nih thu sawiin, Office hawn mai duhtawk lo a, a chhawr tangkaitu tur ten an lo hriat theih nan kalphung leh pawimawhna te uar zawka mipuite zirtir turin thawktute a chah a. YMA leh MHIP te chu thawhpuiah a sawm tel bawk.

District Child Protection Unit (DCPU) Khawzawl Office building hi nikum August, 2021 atang khan mimal In luaha bultan a ni a, kumin April, 2022 thla atang khan Staff-te hi dah tan a ni a, June thla atang khan pangngai taka Office kalpui niin tun dinhmunah hian thawktu mi 12 an awm mek a ni. Khawzawl District Child Protection Unit hnuaiah hian Statutory body pahnih; Child Welfare Committee (Naupang venhim ngai leh tanpui ngaite tan) leh Juvenile Justice Board (Naupang dan bawhchhiaa puhte tan) an awm a. Anni hi September ni 16, 2021 atangin kalpui tan a ni a. CWC leh JJB member-te hi mimala thuneihna pek an ni lova, naupang case ngaihtuaha an thutkhawm lai erawh chuan First Class Magistrate power pek an ni.

Deputy Chief Minister Tawnluia hian Inrinni vek khan Khawzawl District Hospital-a Blood Storage Centre bun thar chu a hawng a, thisen dahkhawlna Khawzawl District-in a nei ta chu lawmawm a tih thu sawiin, hemi atana sum thawhtu company pathum te, Khawzawl DC, CMO leh a hlawhtlinna atana Official hah taka thawk zawng zawngte chungah lawmthu a sawi a. Khawzawl-a Blood Storage Centre awm ta chuan mipuite a tih thlamuan phah hle dawn thu sawiin, thisen la tura Champhai pan dawn chuan darkar khat chuang kal a ngai thin a, tuna an khawl hawn thar chu Khawzawl mipuite tan malsawmna nasa tak a nih thu a tarlang bawk.

Khawzawl District Hospital Blood Storage Centre hawnna inkhawm hi Bawrhsap C.C. Lalchhuangkima chuan a kaihruai a, CMO Dr. Albert Lalhminghlua chuan Blood Storage Centre-ah hian thisen 350 ml, bag 160 bawr vel a leng thei dawn tih sawiin, Medical Officer leh Lab Technician 1 ve ve an duty dawn a ni. Khawzawl District Hospital Blood Storage Centre sakna tur hi Company pathum CSR fund atanga dawn a ni.