Kumin kum chanve ah TB vangin mi 39 thi tawh

Kumin (2022) kum chanve January atanga June thla chhung khan Mizoram-ah TB vangin mi 39 an thi.

National TB Elimination Programme Mizoram atanga report-a a lan danin kumin January atanga June thla chhung khan Mizoram ah TB vei mi 1090 hmuhchhuah an ni a, heng zinga mi 39 te chu TB vang hian thiin an zinga mi 26 te hi Aizawl District chhunga mi an ni. TB vei hmuhchhuah mi 1090 zinga mi 191 te hi HIV positive an ni a, hei bakah hian mi 64 in TB dam har chi an tih mai MDR-TB (Multi Drug Resistant) an vei bawk. TB vei zinga zaa 91 chu enkawl dam an ni. 

Kumin kum chanve chhunga Mizoram a TB vei hmuhchhuah hi Aizawl District-ah tam berin mi 685 zet hmuhchhuah an ni a, Lunglei District in dawtin mi 87 hmuhchhuah an ni bawk a, TB vei hmuhchhuah tlemna ber Mamit District-ah mi 17 hmuhchhuah an ni bawk. 

TB vei hmuhchhuah mi 1090 te zirchianna ah mi 67 te chu Zunthlum vei an ni tih hmuh-chhuah a ni a, mi 353 te chu Zuk leh hmuam ti mi an ni a, mi 148 te chu Zu in mi an ni bawk. HIV vei, Zunthlum nei leh zuk leh hmuam ti bakah Zu in mi te hian TB an vei awlsam bik avangin enfiah nghal vek thin an ni tih State TB Elimination Program Officer Dr. Vanlalfela chuan a sawi bawk a ni.

Comments

Popular posts from this blog