Ni 10 bawr velah sawrkar hnathawkte hlawh pek hman beisei a ni - Lalruatkima Minister

MNF Adviser leh I&PR Minister Lalruatkima chuan ni 10 bawr velah sawrkar hnathawk te hlawh pek hman beisei a ni tih sawiin, “Sum harsatna bul ber chu kan thawhchhuah tlem vang a ni tih hi zep thu a awm lo,” a ti.

MNF Sub-Hqrs. Lunglei buatsaiha ‘Leadership cum Media Training’ nimin-a Lunglei Saikuti Hall-a neih a hmanpuina ah MNF Adviser Lalruatkima chuan ni 10 bawr velah sawrkar hnathawkte hlawh pek hman beisei a ni tih hi sawiin, “Sum harsatna hi tunhnaia thleng chauh a ni lo a, Congress sawrkar hmasa hun chhung zawnga kan hriat a ni a. Mi tam tak nunna suattu Congress sawrkar Zu zawrh pawh kha sum harsatna phuhrukna tura Zu chhiah an it vanga Zu zuar an ni,” a ti a. Tun dinhmunah theihtawp chhuahin sawrkar chuan tan a la mek zel tih sawiin, “Mipuite tan thlaphanna tur a awm lo. Vawiin aia hun khirh leh harsa zawkah pawh min lo hruaikai tawhtu kan Pathian hian min hruai chhuak ngei ang tih kan ring a ni,” a ti.

Sum harsatna thleng mek hi Mizoram chauh a ni lo tih pawh Lalruatkima chuan sawiin, India ram State hrang hrangte pawh an buai hlawm hle niin a sawi a, “Ministry of Finance-in July 1 atangin CSS kalhmang ti danglamin PFMS kaltlanga release zel tur a ni a, CSS Implementing Department-te pawh Single Nodal Account (SNA)-ah sum dah zel tura tih an nih tak vang a ni. Keini State chauh buai fal bik kan ni lo tih hi mipui hriatah ka sawi duh a ni,” a ti a. “Tun dinhmunah tak hian Department hrang hrangten hmasawnna hnathawhna tur sum SNA-ah an kawl tam vanglai tak zawk a ni thei tih kan hriat tel ka duh bawk a ni,” a ti bawk.

I&PR Minister ni bawk Lalruatkima chuan sum harsatna bul ber chu kan thawhchhuah tlem vang a ni tih hi zep thu a awm lo tih sawiin, “Sawrkar chuan thawhchhuah tam zawk kan neihna turin Resource Mobilisation chungchangah theihtawpin hma la mah se, a bik takin Fiscal Defecit Control-na tura pawimawhte hripui leng vangin harsatna a awm a. A bik takin Khawlphetha leh Ration buhfai sum tam taka kan lei, mipui phurrit anih venna tura Subsidised a ni te pawh hi a hlawm lian zual a ni awm e,” a ti a. A Department enkawl RD-in BADP cheng vbc.12.56 chu June ni 14 2022-ah an dawn thu pawh sawiin, BADP sum lapse a awm anga Social Media a tarlan chu thudik lo a nih thu a sawi a. Tunhnaiah mirethei In sakna (PMAY Gramin) cheng vbc. 41.916 zet beneficiary account-ah thun sak an nih thu a sawi bawk.