Dr. BD. Chakma chungchang zirchiang dawn

Assembly Speaker Lalrinliana Sailo chuan, eiruk thubuaia Court in thiamloh a chantir tak leh Jail tang tura a chungthu a rel

Tuichawng bialtu MLA Dr. BD. Chakma chungchang chu Dan lam thiam ten an la zirchian tur thu a sawi. Hemi chungchanga zawhna chhangin Assembly Speaker Lalrinliana Sailo chuan Court-in Dr. BD. Chakma thiamloh a chantir chungchang chu Official-in report an la dawng lo tih sawiin, dan lam thiam ten an la zirchiang dawn niin a sawi a ni. Dr. BD. Chakma chuan Court thutlukna chu Gauhati High Court, Aizawl Bench-ah khin let a tum thu tunhnaia thuthar thehdarhtute a kawmnaah a lo sawi tawh a, dan anga MLA atanga bân theih a nih chuan ban a inhuam thu leh kum 2017-ah pawh Minister atangin awlsam taka a lo bân tawh thu te, tunah pawh dan ang a nih chuan MLA atanga bân a ngam thu te leh harsatna a awm loh thu te a lo sawi tawh a ni.

Tarlan tawh angin cheng nuai 137 tih chingpen thubuaiah Special Court (PC Act) Judge Vanlalenmawia chuan July 25, 2022 khan MLA Dr. BD. Chakma leh mi dang 12-te chu kum khat tang tur leh Rs. 10,000 theuh chawi turin a hrem a, bail-a chhuah lailawk an ni.