Khuai zuk laka a nau nunna chhan tumtu Kristian-a dinhmun a ngaihtuahawm a ni tawh lo

Nilaini kalta-a a nau te Khuai in a zuk chhanhim tuma a beih avanga Khuai in nasa taka an zuk Kristian Vannunzira (9) s/o Rosangzuala, Chhingchhip Venghlun leh a nau Noel Vannunhlimi  te chu Chhingchhip PHC enkawl mek la niin an dinhmun erawh ngaihtuahawm lutuk a ni tawh lo nia thudawn a ni.

Thudawn danin July 27, 2022 (Nilaini) zing dar 8:45 vel khan Kristian Vannunzira hi a naute pathum nen khua atanga hla vak lo Chhungatuikawn, Company hnathawk te Camp-ah thil pawimawh ti turin a pa in a tir a, khawchhung an pelh fel hnu lawkah kawngpui-a an kal laiin Venghlun YMA ram-a Khuai awm nia hriat chuan a nau kum 5 mi Noel Vannunhlimi chu a lu ah a rawn zuk a, hemi hnu hian kum 7 mi a u, Daniel Vannunpuia chu Khawivanrial 3 in an rawn zuk leh bawk a, hemi hnu hian Khawivanrial rual chuan an unau hi rawn bawr zuiin Daniel-a leh a nau Noel-i te hi mahni insaseng tumin an buai a, an te ber kum khat leh thla 10 mi Esther VL. Nunnachhanhimi erawh insaseng ve thei a nih loh avangin Khuai hian a zuk ve lohna tura a taksa lang thei lo turin Kristian Vannunzira hian a bawhkhup hna a, Khuai hian Kristian Vannunzira hi nasa taka zukin nikhua hre lo in a awm zui nghe nghe a ni.

Hetianga buaina an tawh lai hian Serchhip-a Service Maxi Cab pakhat chu rawn kalin chhan tum mah se Khuai hi an tam avangin pawh ngam mai chi a ni lova, a hnuah Pik-Up Truck pakhat rawn kal lehin heng lirthei khalhtu pahnih te hian ruahmanna siamin an Motor khu hmangin Khuai hi an ur a, hetianga an buaipui lai hian midang pawh rawn pungkhawmin a chhak deuha mi In kawt-a puan (Bedsheet) pho lai chu lain he puan hmang hian Kristian Vannunzira te hi khuhin Khuai te pawh hian an kiansan zui a, an unau hian Chhingchhip PHC panpui nghal niin an vai hian admit nghal vek an ni a, chhiar theih mai chinah Kristian Vannunzira taksa-ah hian Khuai zukna hmun 153 vel zet a awm a ni.

Heng vanduaina tawk zinga tel Daniel Vannunpuia leh Esther VL. Nunnachhanhimi te hi damdawi tul ang te pek an nih hnuah an dinhmun a that deuh avangin Ningani khan damdawi In atanga chhuahtir nghal an ni a, Kristian Vannunzira leh Noel Vannunhlimi te erawh nimin thleng khan PHC-ah hian enkawl an ni a, an dinhmun tha chak lutuk lo mah se ngaihtuahawm erawh an ni tawh lo tih an chhungte chuan an sawi a. Kristian-a hi a kut hnung lamah Khuai in a zuk nasat avangin na a la ti deuh a, nimin atang khan damdawi an pek pawh a hniam deuh zawk pek ni tawhin Noel-i erawh a hmai lamah Khuai hian a zuk nasat deuh avangin a mit a la meng hlei thei lo thung a ni.

Comments

Popular posts from this blog